Kuvendi i Kryeqytetit ka aprovuar të premten lokacionet e projekteve strategjike që do të shërbejnë për organizimin e Lojërave Mesdhetare “Prishtina 2030”.
Të lidhura
None found
Sipas kryetarit të Prishtinës, Përparim Rama, masterplani i miratuar parasheh që 71 për qind e aktiviteteve të Lojërave Mesdhetare të vitit 2030 të mbahen në kryeqytet.
Lista e investimeve të planifikuara përfshin Fshatin Olimpik, Qendrën Multisportive, Vertical Gym, Unazën e Qytetit, sistemin e parkingjeve nëntokësore dhe Parkun Botanik. Në plan janë përfshirë edhe projektet që pritet të zhvillohen në zonën e Gollakut.
Rama ka vlerësuar se këto ndërhyrje përfaqësojnë një proces të transformimit afatgjatë të Prishtinës. Ai ka nënvizuar se objektet dhe infrastruktura e ndërtuar për Lojërat Mesdhetare do të përdoren edhe pas përfundimit të këtij eventi.
“Çdo ditë ka rëndësi”, ka shkruar Rama në Facebook, duke kujtuar se kryeqytetit i kanë mbetur më pak se katër vjet për t’u përgatitur për Lojërat Mesdhetare.
“Në 2030 organizojmë Lojërat. Për dekada pas tyre, Prishtina jeton me atë që ndërtojmë sot”, ka deklaruar Rama./
