Presidenti i FSHF-së, Armand Duka ka vlerësuar dhe falenderuar Kombëtaren kuqezi për performancën e saj në ‘Euro 2024’. Ai ka shfrytëzuar rastin, për të falenderuar edhe stafin teknik të kuqezinjve, duke mos harruar tifozët, të cilët i dhanë bukuri stadiumeve gjermane me ngjyrat kuqezi…
“Faleminderit!
Jemi jashtë Euro 2024, pas tre ndeshjesh në një grup me skuadra si Italia, Kroacia e Spanja, por duhet të jemi krenarë. Duhet të jemi krenarë që djemtë na sollën në këtë Europian, duhet të jemi krenarë për atë që dhanë në fushë, duhet të jemi krenarë që u dhamë bukuri tribunave me ngjyrat tona kuqezi, që mbushëm rrugët dhe sheshet në Gjermani duke shpërndarë shumë dashuri, përmes sportit më të bukur në botë, futbollit.
Faleminderit futbollistëve, stafit teknik dhe të gjithë tifozëve për këtë Europian!”, shkruan presidenti Armand Duka në faqen e tij në Facebook.
