Futbollisti francez Paul Pogba ka treguar se ai ka qenë objektiv i zhvatjes dhe kërcënimeve nga një bandë e organizuar.
Mesfushori i Juventusit dhe Francës dha një deklaratë përmes avokatëve të tij të dielën duke thënë se çështja ishte raportuar tek autoritetet, ndërsa policia franceze kishte hapur një hetim.
Më herët, vëllai i Pogba, Mathias postoi video në internet duke premtuar se do të publikonte “zbulime të mëdha” për lojtarin. Mathias Pogba tha se informacioni ka të ngjarë të jetë “shpërthyes”, pa dhënë detaje të mëtejshme.
“Ka kërcënime dhe përpjekje për zhvatje nga një bandë e organizuar kundër Paul Pogba”, thuhet në deklaratë.
“Organet kompetente në Itali dhe Francë janë informuar një muaj më parë dhe nuk do të ketë komente të mëtejshme në lidhje me hetimin në vazhdim”.
Fituesi i Kupës së Botës me Francën në vitin 2018, Pogba u transferua te Juventusi si transferim i lirë këtë verë pasi u largua nga Manchester United.
Në videot e tij, Matthias Pogba tha se “e gjithë bota, si dhe tifozët e vëllait të tij , dhe aq më tepër skuadra franceze dhe Juventusi, bashkëlojtarët e Pogba dhe sponsorët e tij meritojnë të dinë disa gjëra”. Ai tha se zbulimet do të përfshijnë edhe agjentin e Pogba, Rafaela Pimenta. /
