Në një Kupë Bote, synimi i çdo përfaqësueseje është fitorja, por në rrethana të caktuara humbja mund të rezultojë më e favorshme për vazhdimin e rrugëtimit. Para ndeshjeve përmbyllëse të grupeve, po shfaqen disa skenarë të pazakontë dhe llogaritë për kualifikimin po bëhen gjithnjë e më të qarta.
Botërori 2026 do të hyjë në histori si edicioni i parë me 48 skuadra, të shpërndara në 12 grupe me nga katër ekipe. Ndryshe nga formati i mëparshëm me 32 përfaqësuese, ku dy vendet e para kualifikoheshin drejtpërdrejt, tani panorama është dukshëm më e ndërlikuar.
Të lidhura
None found
Në total, 32 ekipe do të arrijnë në fazën eliminatore. FIFA ka sjellë edhe një ndryshim në kriteret e renditjes në rast pikësh të barabarta, duke vendosur përballjet direkte përpara golavarazhit, çka i vështirëson edhe më shumë skenarët.
Situata më e veçantë lidhet me përballjen mes Austrisë dhe Algjerisë. Të dyja kombëtaret kanë nga tre pikë dhe ndeshja e tyre do të jetë e fundit në programin e gjithë fazës së grupeve. Pikërisht kjo e bën sfidën vendimtare, pasi të dy ekipet do ta kenë të qartë paraprakisht se çfarë rezultati u nevojitet për të kaluar më tej.
Ekziston mundësia që një barazim t’i dërgojë të dyja në raundin tjetër, me Austrinë në vendin e dytë dhe Algjerinë mes ekipeve më të mira të vendeve të treta. Por duke qenë se kjo është ndeshja e fundit e fazës së grupeve, të dyja përfaqësueset do ta dinë gjithashtu se humbësi i saj pothuajse me siguri do të kualifikohet si një nga vendet e treta më të mira. Pikërisht këtu situata bëhet edhe më intriguese.
Skuadra që e mbyll grupin në vendin e dytë do të përballet në fazën eliminatore me fituesin e Grupit H, ku shumë gjasa ekziston të jetë Spanja, ekipi i tretë në renditjen botërore dhe një nga pretendentët kryesorë të turneut.
Në anën tjetër, ekipi që avancon si i treti do të luajë kundër njërit prej fituesve të Grupit D (SHBA), B (Kanada ose Zvicër), G (Egjipt, Iran ose Belgjikë), L (Anglia, Gana ose Kroacia) ose K (Portugalia ose Kolumbia).
Kjo tablo sjell menjëherë ndër mend “Turpin e Gijonit” nga Kupa e Botës 1982, turne ku ishin të përfshira po ashtu Austria dhe Algjeria. Ajo ndeshje konsiderohet gjerësisht si një nga më të debatueshmet në historinë e Botërorit dhe u bë shkak për ndryshime në rregullat e FIFA-s në kompeticionet e mëpasshme.
Atëherë, Gjermania Perëndimore fitoi 1-0 ndaj Austrisë, rezultat që i dërgoi të dyja skuadrat në raundin pasardhës. Algjeria e kishte zhvilluar ndeshjen e fundit në grup një ditë më herët. Fitorja 3-2 ndaj Kilit i çoi algjerianët në vendin e dytë me katër pikë, pas Austrisë vetëm për shkak të diferencës së golave, ndërsa Gjermania Perëndimore ishte e treta me dy pikë.
Kjo nënkuptonte se, para përballjes së fundit mes Gjermanisë Perëndimore dhe Austrisë, të dy ekipet e dinin se një fitore gjermane me një ose dy gola diferencë do t’i kualifikonte të dyja. Gjermanët kaluan shpejt në epërsi dhe më pas u krijua përshtypja se të dyja palët ishin të kënaqura me atë rezultat dhe thjesht po e menaxhonin fundin e ndeshjes.
Rastet sulmuese ishin pothuajse inekzistente, ndërsa lojtarët kryesisht qarkullonin topin në prapavijë dhe më pas e largonin pa rrezik. Reagimi i opinionit futbollistik ishte i ashpër: komentatorët refuzuan të vazhdonin transmetimin normal të ndeshjes dhe u kërkuan teleshikuesve të fiknin televizorët, ndërsa gazetat vendase spanjolle raportin e publikuan në rubrikën e kronikës së zezë.
I vetmi pasojë pozitive nga ajo përballje ishte ndryshimi i kalendarit nga FIFA, që bëri të detyrueshme zhvillimin në të njëjtën kohë të ndeshjeve të fundit të çdo grupi në turnetë e ardhshëm.
