Kosova e pret Austrinë të dielën, nga ora 18:00, në stadiumin ‘Fadil Vokrri’ në Prishtinë. Ndeshja zhvillohet në kuadër të raundit të katërt të Ligës së Kombeve.
Të lidhura
None found
‘Dardanët’ kërkojnë fitore për t’iu kthyer rezultateve pozitive, pas humbjes ndaj Austrisë në Vjenë dhe barazimit pa gola me Izraelin.
Pas mbërritjes në Kosovë, përfaqësuesit e Austrisë shprehën pakënaqësi për gjendjen e fushës në ‘Fadil Vokrri’. Përzgjedhësi austriak, Ralf Rangnick, tha se prej kohësh nuk ishte stërvitur në një fushë më të keqe.
Kapiteni i Kosovës, Vedat Muriqi, iu përgjigj ankesës duke e cilësuar atë si një justifikim të kundërshtarit para ndeshjes. Ai kujtoi se, siç kishte thënë edhe trajneri, fusha është e njëjtë për të dyja skuadrat.
Muriqi përmendi Suedinë, Zvicrën dhe Irlandën, e cila kishte qenë aty një javë më parë, duke thënë se asnjëra nuk ishte ankuar për fushën. Ai pranoi se kjo nuk do të thotë që fusha është në gjendje të mirë, por shtoi se ankesa i ngjan më shumë një arsyeje të përgatitur për pas ndeshjes dhe se shpreson të jetë kështu.
