Mourinho paralajmëron Viniciusin: Duhet të përmirësohet ose rrezikon stolin

Reparti sulmues i Real Madridit po pëson ndryshime, ndërsa Jose Mourinho ia ka bërë të qartë Vinicius Juniorit se vendi i tij në formacionin bazë nuk është i garantuar nëse nuk përmirëson paraqitjet në ndeshjet e ardhshme.

Siç raporton Cadena SER, tekniku portugez e ka njoftuar sulmuesin brazilian se Yan Diomande mund ta zëvendësojë në krahun e majtë, nëse ai vijon me formën e paqëndrueshme të treguar në fillim të këtij sezoni.

Roli i rëndësishëm në dy triumfet e mëparshme të Real Madridit në Ligën e Kampionëve ka bërë që Viniciusi të vazhdojë të aktivizohet si titullar. Megjithatë, gjatë sezonit 2026/27, ai ka realizuar një gol dhe ka dhënë tri asistime në shtatë paraqitje.

Edhe në përballjen e fundit me Elchen, të fituar 3-2 nga Real Madridi, 26-vjeçari nuk arriti të spikaste. Ai shpërdoroi tri raste të pastra kur u gjend përballë portierit kundërshtar.

Në të njëjtën ndeshje në “Martinez Valero”, Yan Diomande fitoi duelin në krah dhe asistoi në golin e dytë të madrilenëve. Real Madridi shpenzoi 140 milionë euro për transferimin e tij gjatë afatit kalimtar të verës.

Aftësia e Diomandes për t’u aktivizuar në të dy krahët i siguron stafit teknik më shumë alternativa, si dhe thellësinë e nevojshme në anën e majtë.

Në krahun tjetër, hapësirat për rotacion janë zvogëluar pas konsolidimit të Arda Gulerit si mesfushor ofensiv dhe si futbollist që vendoset në të djathtë.

Si rrjedhojë, gara kryesore për një vend në formacion është përqendruar në krahun e majtë, ku Viniciusi përballet me konkurrencën e përforcimit të ri të Real Madridit.