Milani dhe Modric mbyllin marrëveshjen për kontratën e re

Luka Modric do ta veshë fanellën e Milanit edhe për një sezon, pasi është arritur akordi që kontrata e tij të zgjatet deri në qershor të vitit 2027.

MilanNews dhe gazetari i njohur Fabrizio Romano raportojnë se gjithçka është finalizuar mes palëve. Për ta zyrtarizuar marrëveshjen mbetet vetëm hedhja e firmës, që pritet të ndodhë gjatë kësaj jave.

Futbollisti kroat do të paguhet 3.5 milionë euro për sezon në bazë të kontratës së re, ndërsa në të përfshihen edhe bonuse që varen nga performanca.

Pak javë para se të mbushë 41 vjeç, Modric ka zgjedhur të vijojë karrierën në nivelin më të lartë si pjesë e kuqezinjve. Përpara Kupës së Botës 2026, mesfushori kishte sinjalizuar se mund të tërhiqej nga futbolli.

Legjenda e Kroacisë mbërriti te Milani si lojtar i lirë verën e kaluar, pas etapës së tij të jashtëzakonshme me Real Madridin. Gjatë karrierës, ai ka qenë gjithashtu pjesë e Dinamo Zagrebit dhe Tottenham.

Në edicionin e parë me skuadrën milaneze, Modrić u aktivizua në 37 takime, realizoi dy gola dhe kontribuoi me tre asistime. Ai vazhdon të ketë rolin e një prej liderëve të ekipit, si në fushë ashtu edhe jashtë saj.