Liverpooli është në hapat e fundit për të siguruar shërbimet e anësorit të Paris Saint-Germainit, Bradley Barcola, pasi të dy klubet kanë gjetur gjuhën e përbashkët për transferimin e futbollistit francez.
Të lidhura
None found
Marrëveshja mes “Reds”-ave dhe PSG-së parashikon një shumë fikse prej 106 milionë funtesh, e barasvlershme me rreth 123 milionë euro, ndërsa në kontratë mund të përfshihen edhe 17 milionë funte të tjera në formën e bonuseve.
Negociatat kanë sjellë në vëmendje edhe një detyrim tjetër financiar që lidhet me këtë transferim.
Gazetari Ben Jacobs raporton se Liverpooli ka pranuar të paguajë vetë rreth 5 milionë euro për Lyonin, klubin ku Barcola është formuar.
Kjo pagesë buron nga mekanizmi i solidaritetit i FIFA-s, i cili u garanton klubeve që kanë ndihmuar në zhvillimin e një futbollisti një pjesë të shumës së përfituar nga transferimi i tij.
Meqë Barcola ka kaluar një pjesë të formimit të tij në akademinë e Lyonit, klubi francez pritet të marrë nga 4.5 deri në 5 milionë euro. Shuma përfundimtare do të varet nga vlera e marrëveshjes dhe aktivizimi i bonuseve.
Sipas Jacobs, në bisedimet për 23-vjeçarin kanë marrë pjesë drejtpërdrejt presidenti i Liverpoolit, Mike Gordon, drejtori ekzekutiv Billy Hogan dhe drejtori sportiv Richard Hughes.
Raportohet se të enjten Gordon dhe presidenti i PSG-së, Nasser Al-Khelaifi, kanë rënë dakord që detyrimi ndaj Lyonit të përballohet nga Liverpooli dhe jo nga klubi parisien.
Barcola ka qenë prej kohësh në listën e dëshirave të Liverpoolit dhe transferimi i tij pritet të renditet ndër më të kushtueshmit në historinë e klubit.
Në rast se plotësohen të gjitha kushtet e bonuseve, kostoja e përgjithshme e marrëveshjes mund të shkojë në rreth 123 milionë funte.
