Kupa e Botës 2026 vendos standarde të reja: mbi 1.5 milion tifozë në stadiume dhe shifra televizive rekord

Kupa e Botës 2026 po lë gjurmë të jashtëzakonshme si në fushën e lojës, ashtu edhe jashtë saj, duke regjistruar arritje të reja historike në frekuentimin e stadiumeve dhe në audiencën televizive.

Deri më 17 qershor, ndeshjet e zhvilluara në stadiumet e Amerikës së Veriut janë ndjekur nga më shumë se 1.5 milion tifozë, ndërsa takimet hapëse të vendeve organizatore në Shtetet e Bashkuara, Meksikë dhe Kanada janë parë nga mbi 54 milion shikues.

Data 16 qershor hyri mes ditëve më të mëdha në historinë e këtij kompeticioni, pasi në stadiume u regjistruan gjithsej 281,223 tifozë. Takimi mes Argjentinës dhe Algjerisë mblodhi 69,045 spektatorë në Kansas City, ndërsa dueli Francë – Senegal tërhoqi 80,545 tifozë në New York/New Jersey. Po ashtu, edhe përballjet Norvegji – Irak dhe Austri – Jordani arritën një mbushje mbi 98 përqind të kapacitetit të stadiumeve.

Shifra mbresëlënëse janë regjistruar edhe në transmetimet televizive. Ndeshja e parë e Shteteve të Bashkuara ndaj Paraguait u kthye në ndeshjen më të ndjekur të futbollit ndonjëherë në SHBA, me 27.5 milionë shikues. FOX shënoi rekord historik me 18 milionë shikues në transmetimin në gjuhën angleze, ndërsa Telemundo arriti në 9.5 milionë shikues në transmetimin në spanjisht.

Në Meksikë, ndeshja hapëse e turneut u ndoq mesatarisht nga 23.4 milionë shikues, duke u bërë ndeshja më e shikuar e Kupës së Botës në vend gjatë shekullit të 21-të, me 72.1 përqind pjesëmarrje televizive në treg.

Edhe në Kanada u raportuan të dhëna të forta, pasi ndeshja e përfaqësueses së saj u ndoq mesatarisht nga 3.1 milionë shikues, duke u renditur mes ndeshjeve më të ndjekura në historinë e futbollit kanadez.

Ndërsa faza e grupeve vazhdon ende, pritshmëritë janë që rekordet e frekuentimit dhe të shikueshmërisë të rriten më tej, me ndeshjet vendimtare dhe fazën eliminatore që mund të sjellin edhe më shumë interes global në javët në vijim.