Kanadaja mori një fitore të thellë 6-0 përballë Katarit në Vancouver, në ndeshjen e raundit të dytë të Grupit B në Kupën e Botës, por suksesi i madh u zbeh nga lëndimi serioz i mesfushorit Ismael Kone.
Jonathan David ishte protagonisti kryesor i sfidës, duke realizuar het-trik. Në listën e golashënuesve u futën edhe Cyle Larin dhe Nathan-Dylan Saliba, ndërsa rrënimi i Katarit u kompletua nga autogoli i Mohamed Naceur Almanait. Në minutën e 84-të, për Kanadanë u inkuadrua edhe futbollisti i Hajdukut, Niko Sigur.
Të lidhura
None found
Skuadra vendase e mori menjëherë kontrollin e takimit dhe krijoi disa mundësi të mira që në fillim. Goli i parë erdhi në minutën e 16-të, kur Cyle Larin përfitoi nga një top i kthyer nga portieri Abunad dhe kaloi Kanadanë në avantazh. Më pas, në minutën e 29-të, Jonathan David realizoi për 2-0 me një volej të saktë.
Në minutën e 33-të, arbitri sinjalizoi fillimisht penallti për Kanadanë, por pas rishikimit me VAR, vendimi u korrigjua dhe u dha goditje dënimi, pasi ndërhyrja ndaj Buchanan kishte nisur jashtë zonës. Pavarësisht ndryshimit të vendimit, Ahmed u ndëshkua me karton të kuq dhe Katari mbeti me një futbollist më pak. Në kohën shtesë të pjesës së parë, Jonathan David gjeti sërish rrjetën për golin e tij të dytë personal dhe për rezultatin 3-0.
Fraksioni i dytë nisi me një moment të rëndë. Në minutën e 51-të, Madibo ndërhyri ashpër ndaj Ismael Koné, duke i shkaktuar thyerje të këmbës. Lojtari i Katarit u përjashtua menjëherë me karton të kuq, ndërsa Koné u nxor nga fusha me barelë, i duartrokitur nga tifozët.
Me dy lojtarë më pak në fushë, Katari nuk arriti të reagojë më. Nathan-Dylan Saliba, i futur në lojë në vend të Konés, shënoi një gol të shkëlqyer nga goditja e dënimit në minutën e 64-të dhe ia kushtoi atë bashkëlojtarit të lënduar. Më pas, Mohamed Naceur Almanai devijoi topin në portën e tij për 5-0.
Në kohën shtesë, Jonathan David e mbylli paraqitjen e tij të jashtëzakonshme duke plotësuar het-trikun dhe duke vulosur rezultatin përfundimtar 6-0.
Me këtë sukses, Kanadaja konfirmon pretendimet e saj në Botëror dhe siguron një fitore të rëndësishme, megjithëse festa e vendasve u zbeh ndjeshëm nga dëmtimi i rëndë i Ismael Kone.
