Lindrit Kamberi, Enis Rexhepi dhe Bleon Kurtulus janë emrat e rinj të Kombëtares së Kosovës. Të tre do të jenë në dispozicion të Dardanëve për dy sfidat e radhës në Ligën e Kombeve, kundër Izraelit dhe Irlandës.
Futbollistët përcollën përshëndetjet e tyre të para si përfaqësues të Kosovës në një video të publikuar në faqen zyrtare të Federatës së Futbollit të Kosovës. Në fjalët e tyre u shfaqën krenaria për fanellën e Dardanëve dhe emocionet për këtë etapë të re në karrierë.
Të lidhura
None found
Kamberi u shpreh se ndihet krenar që do të veshë fanellën e Kosovës dhe mezi pret ta bëjë këtë, duke e mbyllur mesazhin me thirrjen “Forca Kosova”.
Edhe Rexhepi foli për krenarinë që është bërë pjesë e përfaqësueses. Ai u prezantua si lojtari më i ri i Kosovës dhe uroi: “Forca Kosova”.
Kurtulus dha një mesazh personal për lidhjen e tij me vendin, duke thënë se zemra i ka rrahur gjithmonë për Kosovën. Edhe ai e përfundoi deklaratën me “Forca Kosova”.
Treshja do të ketë rastin të tregojë aftësitë me fanellën e Kosovës në ndeshjen ndaj Izraelit, që zhvillohet të shtunën në Prishtinë, e më pas në përballjen me Irlandën në Dublin, javën e ardhshme.
