Analiza e bërë nga disa ish-futbolistë pas ndeshjes mes Bayern-it dhe Real-it nuk lë shumë vend për komente. Ish-lojtarë, të cilët sot punojnë si ekspertë pranë medieve më të mëdha në botë. Kanë treguar pikëpamjet e tyre sa i përket ndeshjes së “Allianz Arena”-s.
“Nëse duhet që të evidentojmë një fajtor atëherë mund të drejtojmë gishtin nga Camavinga. Ndërhyrja e tij ishte katastrofike. Në atë pikë të ndeshjes kartoni i kuq ishte shumë i ashpër, por arbitri iu përmbajt rregullave. Real-i gjithmonë fshihet pas arbitrave. Nuk mendoj se i gjithë faji është i Mbappé-së edhe pse në momentin që ai mbërriti në Spanjë në dhomat e zhveshjes së Real-it shikoj probleme të mëdha egoje mes lojtarëve”, tha Emmanuel Petit.
Të lidhura
None found
Një tjetër ish-mesfushor i faturon Vinicius Junior humbjen e Real-it në Mynih. “Të gjithë e dimë se çfarë është i aftë ai që të bëjë kur është në ditë të mirë. Me driblimet e tij kthehet në një makth për mbrojtësit kundërshtarë. Në Mynih humbi shumë lehtë kontrollin e topit, hynte në driblime edhe kur nuk ishin të nevojshme. Mënyra se si u soll me Bellingham kur e ftoi që të mbyllte gojën përmbledh mbrëmjen e tij. Ishte i frustruar dhe vihej re qartë se Vini i vjetër, i cili ndryshonte i vetëm ndeshjet, atë natë kur Real-it i nevojitej më shumë nuk u shfaq. Më vjen keq që po e them por tani është hija e lojtarit, i cili terrorizonte Europën. Talenti është aty, por nuk kishte impakt. Nuk ekzistonte. Nëse ai nuk gjen përsëri shkëndijën e humbur mund të flasim për një nisje në ulje të karrierës së tij”, tha Roy Keane.
