Ish-fituesi i Premier Ligës me Man United merr drejtimin e Watfordit

Ish-lojtari i njohur i Manchester United, Tom Cleverley, është emëruar si trajner i përkohshëm në krye të Watfordit duke zëvendësuar të larguarin Valerien Ismael në ‘Vicarage Road’.

Pas humbjes ndaj Coventryt të shtunën me rezultat 2-1, drejtuesit e klubit u detyruan të bëjnë një ndryshim, duke marrë parasysh se Ëatfordi momentalisht gjendet në pozitën e 13-të në Championship.

Ata tashmë kanë siguruar shërbimet e ish-mesfushorit të ‘Djajve të Kuq’, i cili fitoi Ligën Premier në ‘Old Trafford’ gjatë vitit 2013.

Cleverley nuk është i panjohur për tifozët e Watfordit pasi ka luajtur atje për tri sezone para se të pensionohej verën e kaluar.

Fillimisht ai ishte në krye të grupmoshave U18 të Watfordit, ndërsa tani i është dhënë përgjegjësia që të drejtojë ekipin e parë.

“Tom Cleverley do të marrë pozitën e trajnerit të përkohshëm në ‘Vicarage Road’. Kjo vjen pasi Watford FC shkëputi kontratën e Valerien Ismael pas humbjes ndaj Coventry City.’The Hornets’ duan të falënderojnë Valerien dhe stafin e tij për dedikimin dhe përkushtimin. Sidoqoftë, bordi i klubit e konsideroi kohën e duhur që të bëjë një ndryshim për të përmirësuar rezultatet”, thuhej në njoftimin zyrtar të Watfordit.

Watfordi nuk ka një historik të mirë sa i përket rezultateve të trajnerëve, pasi Cleverley tashmë është bërë trajneri i tyre i 11-të që prej vitit 2020./Telegrafi/