Categories: sport

Dugarry kritikon Ronaldon: Egoja e tij po dëmton imazhin e yllit portugez

Ish-futbollisti i Francës, Christophe Dugarry, ka sulmuar publikisht Cristiano Ronaldon, duke deklaruar se sjellja dhe egoja e portugezit po cenojnë reputacionin që ai ka ndërtuar gjatë karrierës. Fituesi i Kupës së Botës 1998 ka shprehur zhgënjimin për zhvillimet e fundit që lidhen me sulmuesin e Al Nassr dhe Kombëtaren e Portugalisë.

Të lidhura

None found

E ardhmja e Ronaldos me përfaqësuesen portugeze është kthyer në temë diskutimi, ndërsa Dugarry, ish-sulmues i Milanit dhe Barcelonës, ka drejtuar kritika të ashpra ndaj pesë herë fituesit të “Topit të Artë”.

Gjatë emisionit francez “Rothen s’enflamme”, ai foli për largimin e fundit të Ronaldos nga grumbullimi i Portugalisë, pas përplasjeve me përzgjedhësin Jorge Jesus.

“Jam lodhur nga kjo. Është e tmerrshme të tregosh kaq pak respekt për bashkëkombësit dhe kombin tënd”, u shpreh Dugarry në transmetimin e RMC Sport.

Sipas tij, veprimet e fundit të Ronaldos nuk përputhen më me figurën profesionale dhe të përkushtuar ndaj ekipit që futbollisti portugez kishte krijuar gjatë dy dekadave.

“Është e tmerrshme, sepse ky nuk është imazhi që ai përcillte dikur. Në të kaluarën dukej si një njeri i shëndetshëm, lojtar skuadre, një figurë e madhe dhe bujare. Tani më duket se ka ndryshuar dhe se, gjatë muajve të fundit, egoja e tij po e shkatërron nga brenda”, deklaroi Dugarry.

Francezi shtoi se Ronaldo kishte mundësinë të largohej nga skena në mënyrën më dinjitoze, por sipas tij situata tashmë është përkeqësuar. “Mund të ishte larguar përmes derës së madhe, ndërsa tani gjithçka ka përfunduar dhe është prishur. Si mund të rikthehet? Për të bërë çfarë?”, tha ai.

Dugarry vuri në dukje edhe se një futbollist i madh duhet të jetë në gjendje ta kuptojë momentin kur nuk po luan më në nivelin e tij më të lartë.

“Një pjesë e talentit të një lojtari të madh si Ronaldo është edhe të dallojë kur nuk po performon më si më parë. Kjo është parë në tri kompeticione ndërkombëtare radhazi. Kombëtarja e Portugalisë është më efikase pa të”, përfundoi ai.