Dorëheqje në rrethin e Infantinos, këshilltari i lartë kundërshton planin për shitjen e aksioneve të Kupës së Botës

Kriza brenda FIFA-s ka marrë një tjetër përmasë pasi Carlos Cordeiro, këshilltari i lartë i presidentit Gianni Infantino, dha dorëheqje të pakthyeshme në shenjë kundërshtimi ndaj planeve për t’u shitur investitorëve privatë aksione në gara.

Gazetari Ben Jacobs, duke iu referuar mediumit talkSPORT, raportoi se përkrahja për Infantinon ka nisur të zbehet edhe mes bashkëpunëtorëve të tij më të afërt.

Cordeiro, i cili ka qenë president i Federatës së Futbollit të SHBA-së dhe më parë ka punuar si bankier, e kritikoi ashpër nismën e FIFA-s dhe u distancua publikisht prej saj.

“Si këshilltar i lartë i presidentit të FIFA-s, ish-bankier dhe tifoz i përjetshëm i futbollit, nuk mund të qëndroj pasiv ndërsa FIFA po shqyrton mundësinë e shitjes së aksioneve të saj në Kupën e Botës”, deklaroi Cordeiro.

Ai shtoi: “Dua të jem plotësisht i qartë: Nuk kam marrë pjesë në hartimin e këtij propozimi dhe e kundërshtoj në mënyrë kategorike. Për federatat anëtare të FIFA-s, për futbollin dhe për të ardhmen afatgjatë të kësaj loje, ky është një biznes i keq”.

Dalja e Cordeiros nga detyra ndodhi pasi UEFA, CONCACAF dhe AFC, tre konfederatat kryesore kontinentale, shprehën publikisht kundërshtimin e fortë ndaj planeve të Infantinos. Ky zhvillim e ka lënë presidentin e FIFA-s thuajse të izoluar në përpjekjen për të komercializuar kompeticionin më të madh të futbollit në botë.