Mauricio Pochettino ka thënë se ai nuk do të dorëzohet në misionin e tij për tu munduar që ta ndryshojë mendjen e tifozëve të Chelseat, të cilët kërkuan largimin e tij pas ndeshjes me Brentfordin të shtunën.
Por, trajneri i klubit londinez duket se e ka humbur mbështetjen e shumicës së tifozëve të klubit andaj e ardhmja e tij po vazhdon të jetë gjithnjë e më shumë në dyshim.
Chelsea pritet të qëndrojë me Pochettinon të paktën deri në fund të sezonit. Hierarkia e klubit nuk dëshiron një përsëritje të sezonit të kaluar, kur ata shkarkuan Graham Potter në prill dhe më pas mbaruan sezonin në një mënyrë të tmerrshme.
Sidoqoftë, atmosfera brenda Chelseat po kërcënon të bëhet toksike dhe situata duket se nuk është aspak e qëndrueshme, ka bërë të ditur The Standard.
Kishte pasur gjithashtu thirrje nga tifozët të cilët kërkonin rikthimin e Jose Mourinhos, teksa me kritika të mëdha u përcoll pronari Todd Boehly, i cili mori pjesë në garën e Çmimit të Madh në Bahrein për Formula 1, në të njëjtën kohë kur Chelsea po zhvillonte ndeshjen.
Chelsea nuk ishin të interesuar për të emëruar Mourinhon në stol verën e kaluar, dhe asgjë më ndryshe nuk pritet të ndodhë as tani, përkundër faktit që tekniku portugez tani është në pritje të ofertave pas shkarkimit nga Roma.
“Blutë e Londrës” janë 19 pikë larg top katërshes në Ligën Premier dhe gjashtë pikë larg West Hamit që renditet në pozitën e shtatë. /Telegrafi/
