Brazili ngre zërin ndaj FIFA-s, CBF kërkon që Cesar Ramos të mos gjykojë më ndeshjet e “Seleçaos”

Konfederata Braziliane e Futbollit (CBF) ka bërë një lëvizje të pazakontë, duke dorëzuar një ankesë zyrtare në FIFA pas debateve për arbitrarin në ndeshjen e Kupës së Botës ndaj Skocisë.

Ndonëse Brazili e fitoi bindshëm takimin me rezultatin 3-0, drejtuesit e futbollit brazilian mbeten të irrituar nga anulimi i golit të Vinicius Junior dhe kanë kërkuar që arbitri i asaj sfide të mos emërohet më asnjëherë në ndeshjet e tyre.

Episodi i kontestuar i përket minutës së 21-të në përballjen e fundit të Grupit C. Pasi Brazili kishte kaluar në avantazh me një gol të shpejtë të Viniciusit, sulmuesi i Real Madridit shënoi sërish pasi i rrëmbeu topin Jack Hendry dhe e mposhti me qetësi portierin Angus Gunn.

Arbitri Cesar Ramos e quajti fillimisht të rregullt golin, por më pas VAR-i ndërhyri dhe goli u anulua për një faull të dyshuar në fillim të aksionit.

Ky vendim solli reagime të forta në kampin brazilian. Skuadra e drejtuar nga Carlo Ancelotti vlerëson se kontakti ishte minimal dhe se nuk plotësonte standardin e “gabimit të qartë dhe evident” që do të justifikonte ndërhyrjen e VAR-it.

Presidenti i CBF-së, Samir Xaud, e ka çuar më tej këtë çështje përmes një letre zyrtare drejtuar presidentit të FIFA-s, Gianni Infantino, ku ngre shqetësimin për mungesë konsistence në vendimet e arbitrave gjatë turneut.

Kërkesa konkrete e CBF-së është që arbitri meksikan Cesar Ramos të mos caktohet më në ndeshjet e Brazilit në Amerikën e Veriut.

Sipas dokumentit të publikuar nga media braziliane Estadao, federata sjell në vëmendje edhe një “histori negative” me Ramosin, që lidhet me Kupën e Botës 2018 në sfidën kundër Zvicrës.

Brazili pretendon se në atë ndeshje iu mohua një penallti e qartë dhe se nuk u akordua një faull në aksionin që çoi te goli i barazimit të zviceranëve.

Në letrën zyrtare thuhet se, nisur nga këto episode, Ramos nuk duhej të ishte emëruar fare për ndeshjen ndaj Skocisë.

Dokumenti thekson gjithashtu se anulimi i golit “dukej i papritur jo vetëm për lojtarët e Brazilit, por edhe për futbollistët skocezë, reagimet e menjëhershme të të cilëve tregonin se as ata nuk prisnin një rishikim nga VAR-i apo anulimin e golit”.