Raphinha i dëmtuar, Brazili në ankth edhe për fazën eliminatore

Kampi i Brazilit në Kupën e Botës 2026 është përfshirë nga shqetësimi, pasi Federata Braziliane e Futbollit (CBF) ka bërë të ditur se Raphinha ka pësuar një dëmtim muskulor në pjesën e pasme të kofshës së djathtë. Kjo situatë hedh dyshime mbi vazhdimësinë e tij në fazat vendimtare të turneut.

Futbollisti i Barcelonës ndjeu probleme fizike gjatë triumfit 3-0 ndaj Haitit dhe u detyrua të lërë fushën në minutën e 38-të. Menjëherë pas përfundimit të ndeshjes, ai iu nënshtrua kontrolleve të para nga stafi mjekësor brazilian, ndërsa analizat më të hollësishme u kryen pasi skuadra u kthye në New York.

Në komunikatën zyrtare, CBF sqaroi se lojtari do të ndjekë një program intensiv rikuperimi nën kujdesin e ekipit mjekësor të përfaqësueses braziliane, me qëllim kthimin sa më të shpejtë në fushë. Megjithatë, federata nuk ka përcaktuar ende një afat konkret për rikthimin e tij.

Ky dëmtim përbën një problem serioz për Carlo Ancelottin, i cili gjatë këtij Botërori është përballur tashmë me disa mungesa të rëndësishme.

Raphinha vlerësohet si një nga elementët më të rëndësishëm në repartin ofensiv dhe si pjesë kyçe e skemave të teknikut italian. Gjendja bëhet edhe më alarmante po të kihet parasysh se ky është dëmtimi i katërt muskulor në kofshë që braziliani pëson në 12 muajt e fundit.

Brenda kampit të Brazilit ka optimizëm se ai mund të jetë gati për fazën e 1/16-ve, por aktivizimi i tij në ndeshjet e ardhshme mbetet ende i pasigurt.

Rregullorja e FIFA-s nuk u jep mundësi skuadrave të zëvendësojnë futbollistët e dëmtuar gjatë turneut, ndaj Ancelotti do të duhet të gjejë zgjidhje brenda grupit aktual.

Nëse Raphinha nuk arrin të luajë, Endrick, Rayan dhe Luiz Henrique shihen si alternativat kryesore për të marrë më shumë përgjegjësi në sulm.

Problemet fizike e kanë shoqëruar Brazilin gjatë gjithë turneut. Krahas Raphinhas, përfaqësuesja braziliane ka pasur mungesat e Eder Militaos, Estevaos, Rodrygos dhe Wesleyt, ndërsa Neymar vetëm së fundmi ka nisur rikthimin pas një mungese të gjatë nga fushat.