Brazili e lë sërish jashtë Neymarin, sulmuesi mbetet në hotel për të vijuar rikuperimin

Brazili do ta luajë edhe ndeshjen e dytë të Kupës së Botës 2026 pa figurën e tij kryesore, Neymar.

Sulmuesi vazhdon të ketë shqetësime fizike dhe, për këtë arsye, nuk do të jetë në dispozicion të trajnerit Carlo Ancelotti në përballjen ndaj Haitit.

Konfederata Braziliane e Futbollit e bëri të ditur vendimin përmes një njoftimi zyrtar.

“Lojtari Neymar nuk do të udhëtojë me delegacionin drejt Filadelfias. Ai do të qëndrojë në New Jersey për të optimizuar fazën përfundimtare të rikuperimit, duke shfrytëzuar kushtet dhe infrastrukturën e disponueshme në Hotel The Ridge dhe Columbia Park CT”, thuhet në njoftimin e CBF-së.

Pas barazimit 1-1 ndaj Maroku në takimin e parë të turneut, përfaqësuesja braziliane synon të marrë fitoren e parë edhe pse ende pa numrin 10, i cili nuk e ka mbyllur procesin e riaftësimit.

Kjo do të jetë sfida e dytë me radhë që Neymar e humbet në këtë Kupë Bote, ndonëse vetëm një ditë më parë ai kishte dhënë sinjale pozitive gjatë një seance stërvitore.

“A ju kam munguar?”, u tha ai me humor gazetarëve të pranishëm, duke lënë të kuptohej se rikthimi i tij mund të ishte afër.

Megjithatë, aktivizimi i tij kundër Haitit shihej si i vështirë, pasi braziliani ende nuk është stërvitur së bashku me pjesën tjetër të skuadrës.

Aktualisht, Neymar po ndjek një plan individual rikuperimi nën mbikëqyrjen e stafit fizik të kombëtares, teksa po punon i veçuar edhe me topin.

Sipas raportit mjekësor të publikuar më herët, ai parashikohej të mungonte nga dy deri në tre javë. Deri tani kanë kaluar rreth 20 ditë nga lëndimi, gjë që shton shpresat se mund të jetë gati për ndeshjen e tretë të fazës së grupeve ndaj Skocia.

Stafi teknik i Brazilit nuk dëshiron të marrë asnjë rrezik me gjendjen e sulmuesit, ndërsa objektivi kryesor mbetet kthimi i tij në formën më të mirë të mundshme për fazën vendimtare të turneut.