Bellingham shkëlqen me Anglinë, ndërsa Kane mbetet në garë për Topin e Artë

Jude Bellingham konfirmoi sërish statusin e tij si një prej mesfushorëve më të spikatur në botë, pasi ishte figura kryesore në suksesin 2-0 të Anglisë ndaj Panamasë në Kupën e Botës 2026.

Pas përfundimit të takimit, gjatë një interviste për ITV, nga shkallët e stadiumit nisën thirrjet e tifozëve anglezë që këndonin në kor “Hey Jude”. Duke buzëqeshur, Bellingham e ndërpreu bisedën me fjalët: “Më mirë të shkoj”, për t’iu bashkuar festës së tifozëve që po brohorisnin për të.

Në aspektin individual, 22-vjeçari zhvilloi një ndeshje thuajse pa asnjë të metë. Ai e mbylli sfidën me numrin më të lartë të pasimeve kyçe, me më shumë driblime të realizuara me sukses dhe me më shumë duele të fituara, teksa shtoi edhe një gol e një asistim, duke merituar vlerësimin si lojtari më i mirë i ndeshjes.

Edhe pse te Anglia Harry Kane vijon të shihet si emri kryesor në garën për Topin e Artë, paraqitjet e Bellingham po tregojnë se ai është futbollisti që i jep ritëm skuadrës në çdo dimension të lojës.

Ai udhëheq repartin e mesfushës, ndërton aksione, fiton duele dhe shfaqet gjithmonë kur ekipi ka më shumë nevojë.

Pak javë përpara nisjes së Botërorit, kishte pikëpyetje nëse Bellingham do ta niste si titullar. Thomas Tuchel po shqyrtonte seriozisht edhe opsionin e Morgan Rogers në rolin e mesfushorit ofensiv, pasi sezoni i Bellingham te Real Madridi nuk kishte përmbushur pritshmëritë.

Megjithatë, lojtari i Real Madridit u përgjigj ndaj çdo dyshimi me atë që dha në fushë. Në ndeshjen e parë kundër Kroacisë, ai pati një nisje jo të lehtë, ashtu si gjithë Anglia, por më pas mori në kontroll ritmin e sfidës falë depërtimeve, energjisë, ndërhyrjeve të forta dhe gatishmërisë për të marrë përgjegjësi në çastet vendimtare.

Përballja ndaj Ganës rezultoi e ndërlikuar, pasi skuadra afrikane u mbrojt në mënyrë të organizuar.

Ndonëse FIFA e shpalli Bellingham lojtarin e ndeshjes, ai reagoi me modesti duke thënë se një prej mbrojtësve të Ganës e meritonte atë çmim për mënyrën si kishte përballuar presionin e Anglisë.

Në takimin e fundit të fazës së grupeve kundër Panamasë, Anglisë i nevojitej patjetër fitorja për ta mbyllur grupin në vendin e parë dhe për të siguruar një rrugëtim më të favorshëm në fazën eliminatore. Pjesa e parë ishte e ekuilibruar, por në fraksionin e dytë Bellingham mori drejtimin e gjithçkaje.

Ai realizoi golin e parë pas një goditjeje nga këndi, duke fituar duelin në zonë. Vetëm pak minuta më vonë, ndërtoi një aksion të shkëlqyer individual dhe shërbeu për Harry Kane, i cili vulosi triumfin 2-0.

Kjo paraqitje jo vetëm që vërtetoi formën e lartë të Bellingham, por tregoi gjithashtu se ai është shndërruar në liderin e ri të Anglisë.

Në një Botëror ku shumë emra të mëdhenj po përpiqen të lënë gjurmë, mesfushori i Real Madridit po dëshmon se është gati të udhëheqë “Tre Luanët” drejt synimeve më të mëdha.