Bellingham reagon pas eliminimit dhe u dërgon thirrje tifozëve anglezë

Pas humbjes 2-1 ndaj Argjentinës në gjysmëfinalen e Kupës së Botës, Jude Bellingham u kërkoi mbështetësve të Anglisë të mos e humbin frymën e bashkimit që e kanë dëshmuar gjatë gjithë rrugëtimit të “Tre Luanëve”.

Përfaqësuesja e drejtuar nga Thomas Tuchel krijoi avantazhin në minutën e 55-të me golin e Anthony Gordon, por Argjentina e përmbysi rezultatin në fazën e fundit të ndeshjes falë realizimeve të Enzo Fernandez dhe Lautaro Martinez.

Eliminimi në gjysmëfinalen e zhvilluar në Atlanta e la mesfushorin 23-vjeçar pa fjalët e duhura për të përshkruar zhgënjimin. Bellingham, i cili luan për Real Madridin, e mbylli turneun me gjashtë gola dhe iu drejtua më pas rrjeteve sociale me një mesazh të ndjerë për tifozët.

Ai publikoi edhe një poezi frymëzuese, të cilën, sipas tij, ia kishte dhuruar shoferi i ekipit, Michael Chandler.

“E kisha vërtet të vështirë të gjeja fjalët e duhura për ditën e djeshme dhe javët e fundit, por kjo poezi nga shoferi ynë në Kansas e përshkruan pothuajse në mënyrë perfekte”, shkroi Bellingham.

“Faleminderit për mbështetjen e jashtëzakonshme nga vendi ynë dhe për të gjithë ata që shpenzuan paratë e tyre të fituara me shumë mund për të udhëtuar drejt Amerikës dhe për të na mbështetur”.

“Mos lejoni që uniteti dhe dashuria që kemi parë në vendin tonë të përfundojnë me këtë fushatë. Kur jemi së bashku, mund të arrijmë gjëra të mëdha… Dhe do t’i arrijmë!”, përfundoi ai.