Barcelona është në pritje që Julian Alvarez të bëjë publike dëshirën për t’u larguar nga Atletico Madridi, tashmë që aventura në Kupën e Botës 2026 ka marrë fund, shkruan e përditshmja spanjolle SPORT.
Të lidhura
None found
Sipas raportimit, sulmuesi i kombëtares argjentinase kishte zgjedhur të heshtte mbi planet e tij gjatë kompeticionit, për të mos futur zhurmë e shpërqendrime në radhët e ekipit kombëtar.
Tani që turneu ka përfunduar, te Barcelona mendojnë se 26-vjeçari është i përgatitur të ndërmarrë një hap publik, i shtyrë nga pakënaqësia ndaj qëndrimit të prerë të klubit madrilen, i cili nuk pranon të hapë asnjë lloj dialogu për një kalim të mundshëm.
Artikulli thekson se Alvarez është ndjerë i zhgënjyer thellë pasi drejtuesit e Atleticos deklaruan se ai është i patransferueshëm në çdo skenar, duke iu kundërvënë asaj që lojtari pretendon se i ishte premtuar fillimisht: se në përfundim të sezonit do të ishte i lirë të largohej nëse e shprehte vetë një gjë të tillë.
Te klubi katalanas janë të bindur se një dalje e hapur e argjentinasit në media do të rriste ndjeshëm presionin mbi Atleticon dhe do të krijonte kushtet për të nisur bisedimet zyrtare mes dy palëve.
Julian Alvarez mbetet emri kryesor në krye të listës së Barcelonës për forcimin e sulmit, por durimi i “blaugranave” nuk është i pakufizuar.
Raporti bën të ditur se klubi i ka vënë vetes datën 31 korrik si piketë të brendshme për të parë nëse kjo lëvizje është e realizueshme.
Në momentin që ky afat të kalohet pa asnjë zhvillim konkret, Barcelona do të riorientojë energjitë e saj drejt alternativave të tjera në tregun e transferimeve.
Sulmuesi lidhet vazhdimisht me një kalim te gjiganti katalanas në këtë periudhë merkatoje, ndërkohë që së fundi ishte një nga protagonistët e kombëtares së Argjentinës që arriti deri në finalen e Botërorit 2026.
