Barcelona i përgjigjet ashpër Atletico Madridit për Julian Alvarezin: Deklarata të pasjellshme dhe mosrespektuese

Zëvendëspresidenti i Barcelonës, Rafa Yuste, ka reaguar me tone të forta ndaj komenteve të presidentit të Atletico Madridit, Miguel Angel Gil Marin, për situatën e transferimit të Julian Alvarez.

Sipas Yustes, fjalët e drejtuesit madrilen janë të papërshtatshme dhe tregojnë mungesë respekti ndaj klubit katalanas, i cili, siç theksoi ai, ka vepruar gjithmonë me profesionalizëm.

“Ajo që më surprizon është se, duke njohur Gil Marinin, ai ka bërë këto deklarata. Është e pasjellshme dhe mosrespektuese. Presidenti ynë, drejtoria sportive dhe i gjithë klubi kanë qenë shembull i punës dhe profesionalizmit për shumë vite”, deklaroi Yuste.

Ai nënvizoi se deklaratat e presidentit të Atletico Madridit kanë tejkaluar atë që Barcelona e konsideron si një “vijë të kuqe”.

“Këto fjalë kalojnë një vijë të kuqe. Nuk i kuptoj aspak, nuk pajtohem me to dhe më revoltojnë”, u shpreh Yuste.

Yuste u pa duke biseduar me Gil Marinin përpara deklaratave të këtij të fundit dhe më pas tregoi se çfarë ishte diskutuar mes tyre.

“U përshëndetëm, sepse besoj se në jetë duhet të kemi vlera si qytetaria. Fola me presidentin Enrique Cerezo dhe me familjen Gil dhe ndamë ndjenjat tona. U thashë se jemi të qetë. Nuk mund të tolerojmë të bëhet diçka jashtë procedurave të përcaktuara nga klubi”, tha ai.

I pyetur nëse Barcelona është tërhequr nga gara për transferimin e Julian Alvarez, zëvendëspresidenti i klubit nuk dha një përgjigje përfundimtare.

“Afati kalimtar mbyllet pas disa ditësh dhe kaq. Ndihem shumë keq për këtë situatë, vërtet. Ajo që duhet të bëj është të mbroj klubin dhe profesionistët tanë, si Deco dhe Bojan. Kjo po kalon një vijë të kuqe”, deklaroi ai.

Megjithatë, Yuste bëri të qartë se Barcelona vazhdon ta respektojë Atletico Madridin si institucion dhe se mundësia për Julian Alvarezin mbetet e hapur, nëse lojtari dëshiron të transferohet te klubi katalanas.

“Ne e respektojmë Atletico Madridin si institucion dhe të gjithë futbollistët në botë. Nëse një lojtar dëshiron të vijë, ne do të jemi të lumtur ta mirëpresim”, përfundoi Yuste.

Ndërkohë, Atletico Madridi ka bërë të ditur se do të vijojë procedurat ligjore ndaj Barcelonës për këtë çështje.