Rrëfimi i Klodian Hoxhës: Nga seriali serb te planet për në Kanë

Aktori shqiptar Klodian Hoxha së shpejti do të shfaqet në ekranet e televizionit publik serb, si pjesë e kastit të një seriali të ri. Gjatë një interviste në emisionin “Në Shtëpinë Tonë” në Top Channel, ai ndau detaje nga përvoja e tij dhe rruga që ndoqi për t’u bërë pjesë e këtij produksioni.

Hoxha tregoi se fillimisht kishte kryer një audicion për një rol tjetër, por për shkak të gjuhës serbe e kishte refuzuar ofertën, duke i thënë agjentit se nuk mund ta realizonte. Më pas, ai mori një propozim të ri për një personazh që kërkonte shqip, anglisht dhe gjermanisht. “Një agjent më ndihmoi të kapërcej kufijtë. Në fillim thashë jo, por më pas më erdhi një rol ku flitet shqip, anglisht dhe gjermanisht. Interpretoj një bos që banon në Beograd”, shpjegoi aktori, pa dhënë shumë hollësi të tjera.

Ndër të tjera, ai zbuloi se po punon për një projekt të rëndësishëm personal, i cili synon të jetë pjesë e festivalit të Kanës. “Po përpiqemi të sjellim diçka nga ne, në fushën e produksionit. Është një ide shumë tërheqëse. Synimi është të krijojmë një film shqiptar, ku unë do të jem gjithashtu i përfshirë nga ana e produksionit”, u shpreh ai.

Karriera e Klodian Hoxhës shtrihet si në teatër, ashtu edhe në kinemanë vendase dhe atë ndërkombëtare. I diplomuar në Akademinë e Arteve në Tiranë, ai tashmë e sheh veten drejt një rruge të re, atë të producentit të filmit.