Aktori shqiptar Klodian Hoxha tregon si u bë pjesë e një seriali serb

Klodian Hoxha i është bashkuar kastit të një seriali serb, i cili do të shfaqet në televizionin publik të Serbisë.

Gjatë intervistës në emisionin “Në Shtëpinë Tonë” në Top Channel, aktori shqiptar rrëfeu prapaskenat e përfshirjes së tij në këtë projekt. Hoxha tregoi se një agjent e ndihmoi të kapërcente kufijtë dhe se fillimisht kishte zhvilluar audicion për një personazh tjetër. Roli ishte në gjuhën serbe, ndaj ai e refuzoi në fillim, duke thënë se nuk mund ta realizonte.

Më pas, aktorit iu propozua një rol tjetër, ku dialogët zhvilloheshin në shqip, anglisht dhe gjermanisht. Në serial, ai interpreton një bos që jeton në Beograd. Hoxha nuk deshi të ndante hollësi të tjera rreth personazhit.

Aktori njoftoi gjithashtu se së shpejti do të prezantojë një projekt të madh personal, i cili do të jetë pjesë e festivalit të Kanës. Ai tha se po përpiqen të krijojnë diçka të tyren në aspektin e produksionit, duke e cilësuar nismën si shumë interesante. Synimi është realizimi i një filmi shqiptar, ku Hoxha do të angazhohet edhe si pjesë e produksionit.

I diplomuar në Akademinë e Arteve në Tiranë, Klodian Hoxha e ka zhvilluar karrierën e tij si në teatër, ashtu edhe në kinematografinë shqiptare dhe atë ndërkombëtare. Ai shprehet se në të ardhmen e afërt e sheh veten edhe në rolin e producentit të filmave.