Gjatë një bisede në emisionin “Goca dhe Gra” për divorcin dhe perceptimin e shoqërisë ndaj grave të divorcuara, Selin Bollati ndau një histori personale lidhur me familjen e saj.
Të lidhura
None found
Ajo rrëfeu se pas pjesëmarrjes në “Big Brother” marrëdhënia mes prindërve të saj kaloi një periudhë shumë të vështirë, pasi vendimi për të marrë pjesë në program shkaktoi një përplasje që u shndërrua në një krisje serioze mes tyre.
“E kam përjetuar vetë. Vendimin për të hyrë në ‘Big Brother’ njëri prind e mbështeti, ndërsa tjetri jo. Askush nuk erdhi të më pyeste se përse e mora atë zgjedhje me miratimin e njërës palë dhe kundërshtimin e tjetrës. Megjithatë, kjo u kthye në një konflikt të brendshëm mes tyre”, tregoi Selin Bollati.
Pas pyetjes së Ori Nebijajt nëse bëhej fjalë për eksperiencën në “Big Brother”, Selin konfirmoi se pikërisht ajo kishte qenë shkaku i situatës.
“Po, për rastin e ‘Big Brother’-it. Unë e mora atë vendim me dakordësinë e të dy prindërve. Por, në fund, për njërin prej tyre ky rrugëtim nuk u përqafua, ndërsa për tjetrin ishte dëshira që unë të sfidoja veten dhe më dha lirinë ta çoja deri në fund”, shpjegoi ajo.
Sipas Selinës, tensionet nuk përfunduan bashkë me eksperiencën televizive. Përkundrazi, ato vazhduan edhe pas daljes së saj dhe ajo e konsideronte veten si shkaktaren e përplasjes së rëndë mes prindërve.
“Edhe pasi eksperienca përfundoi, krisja vazhdoi dhe arsyeja isha unë. Në një moment, prindërit e mi po kalonin një problem shumë serioz në marrëdhënien e tyre për shkakun tim. Kur situata ishte e tensionuar, ua kam rrëfyer shpesh edhe miqve të mi”, tha Bollati.
Kjo përvojë e bëri Selinën të mendojë për divorcin dhe ndikimin që mund të ketë një fëmijë në marrëdhënien e prindërve.
“Në një pikë u ndala dhe mendova se edhe divorci mund të shihet nga një kënd tjetër. Ndonjëherë fëmija mund të bëhet faktori që i çon prindërit drejt ndarjes. Por, duke u nisur nga rasti im, ai mund të ketë gjithashtu forcën për t’i bashkuar sërish”, u shpreh ajo.
Kur Orinda Huta e pyeti se çfarë po ndodhte në atë moment, Selin bëri të ditur se prindërit e saj tashmë janë bashkë.
“Sot prindërit e mi janë bashkë. E kam treguar edhe më herët këtë histori me publikun, sepse ishte rezultat i negociatave që bëra. E kuptova se problemi isha unë dhe vendosa të ndërhyja”, rrëfeu ajo.
E pyetur nëse kjo situatë e kishte rënduar, Selin u përgjigj se ajo e kishte ndier si një përgjegjësi të madhe.
“Është përgjegjësi, sepse nuk ka fëmijë që dëshiron ta shohë keq njërin prej prindërve”, përfundoi Selin Bollati.
