Niamh O’Brien, valltare e njohur irlandeze dhe partnerja e jetës së yllit të “Riverdance”, Michael Flatley, ka vdekur në moshën 52-vjeçare.
Të lidhura
None found
Flatley e konfirmoi lajmin përmes një postimi në rrjetet sociale, ku shprehu dhimbjen për humbjen e bashkëshortes së tij, me të cilën kishte qenë i martuar prej 20 vitesh. “Zemra ime është thyer. Kam humbur gruan time të bukur, Niamh, dhe shoqen time më të mirë. Nusja ime e mrekullueshme prej 20 vitesh është larguar te Zoti në parajsë”, shkroi ai.
Artisti e kujtoi O’Brien si një nënë dhe bashkëshorte të jashtëzakonshme, duke theksuar se jeta e familjes së tyre nuk do të jetë më e njëjtë pa të.
Sipas një përfaqësuesi të familjes, O’Brien ndërroi jetë paqësisht në Beacon Hospital në Dublin, pas një periudhe sëmundjeje. Familjarët kanë kërkuar privatësi dhe kanë shprehur mirënjohjen e tyre për mjekët dhe personelin e spitalit që u kujdesën për të.
O’Brien kishte ndërtuar gjithashtu një karrierë në skenën e kërcimit irlandez. Ajo luajti rolin kryesor të Saoirse në “Lord of the Dance” dhe mori pjesë në produksionet “Riverdance”, “Feet of Flames” dhe “Celtic Tiger”.
Michael Flatley dhe Niamh O’Brien u martuan në vitin 2006, ndërsa një vit më pas u bënë prindër të një djali, Michael St James.
Gjatë periudhave të vështira shëndetësore, O’Brien qëndroi pranë bashkëshortit të saj. Flatley njoftoi në vitin 2023 se ishte diagnostikuar me një formë agresive të kancerit dhe kishte folur më herët për mbështetjen e familjes gjatë trajtimit.
Informacionet për ceremoninë e varrimit do të publikohen më vonë./TAR
