VLEN pyet: A lidhen paralajmërimet e Ahmetit për largim nga politika me Artan Grubin?

Ngritja e aktakuzës ndaj Artan Grubit ka shkaktuar tensione brenda BDI-së, ndërsa nga VLEN thonë se shqetësimi lidhet me atë që ai mund të kujtojë.

Sipas VLEN-it, Ali Ahmeti po paralajmëron largimin nga politika aktive, duke pretenduar se dëshiron të tërhiqet, por se bashkëpartiakët nuk e lejojnë. Këtë arsyetim ata e cilësojnë si “përrallë me mbret”, siç thuhet në popull.

Nga VLEN deklarojnë se prej kohësh e kanë përshkruar Artan Grubin si “kutinë e zezë” të BDI-së, pasi shumë llogari dhe zhvillime brenda partisë varen nga prania ose mungesa e tij.

Ata vlerësojnë se nuk është e rastësishme që Bujar Osmani, i cili ndodhet në pozicion startues, ngre në publik çështje dhe pyetje që lidhen me Grubin, qoftë drejtpërdrejt apo tërthorazi.

Sipas VLEN-it, Islam Abazi do të ketë një rol me peshë të madhe në zhvillimet e ardhshme në BDI. Siç pretendojnë ata, brenda kësaj partie po bëhen përpjekje të dëshpëruara për të krijuar idenë se gjithçka është nën kontroll, megjithëse situata prej kohësh u ka rrëshqitur nga duart.

Në përmbledhje, VLEN thotë se personi që do të bëhet kurban do të përcaktohet nga ajo që Artani mund të ketë “kënduar si bilbil”.

“Për Ali Ahmetin, periudha e vështirë sapo ka nisur. Përpara nuk mund të dalë, ndërsa prapa nuk ka ku të shkojë”, thonë nga VLEN./Telegrafi/