VLEN: Garancitë e Ahmetit për pafajësinë e Grubit po e çojnë atë drejt dënimit

VLEN deklaron sot se këmbëngulja e Ali Ahmetit për të garantuar pafajësinë e Artan Grubit, në fakt, mund të përfundojë duke ndikuar në dënimin e tij.

Sipas VLEN-it, sa më shumë që Ahmeti përpiqet ta mbrojë Grubin, aq më tepër krijohet përshtypja se ai po e sakrifikon. Edhe më herët, kur Ahmeti siguroi se nuk do të kishte aktakuzë dhe se Grubi do të lirohej, zhvillimet shkuan në drejtim të kundërt: paraburgimi i Grubit u zgjat dhe ndaj tij nisi procedura.

VLEN ngre pyetjen se çfarë po synon të pengojë Ahmeti dhe nëse ai ka frikë nga ajo që mund të dëshmojë Grubi. Sipas tyre, Ahmeti mund ta ketë pranuar me vetëdije sakrifikimin e tij, duke llogaritur se kështu do t’i krijojë vetes mundësinë për t’u rikthyer në pushtet.

Partia vlerëson se, duke deklaruar vazhdimisht se Grubi është i pafajshëm, Ahmeti po kontribuon në drejtim të kundërt dhe po e afron atë me një dënim të mundshëm.

Presioni politik dhe publik ndaj gjykatës, në një çështje ku është i përfshirë një person që ndodhet në listën e zezë të SHBA-së, sipas VLEN-it, mund të sjellë vetëm rezultat të kundërt. Kjo lojë e rrezikshme politike e Ahmetit, thekson partia, po përshpejton largimin e tij nga politika, ndërsa është vetëm çështje kohe që pakënaqësia brenda BDI-së të bëhet publike.

VLEN shton se prej dy vitesh Ahmeti u premton mbështetësve të tij se kthimi në Qeveri do të ndodhë sot ose nesër. Megjithatë, kjo nuk ndodhi dhe në zgjedhjet lokale BDI-ja pësoi debakël. Tani, sipas partisë, ai po përpiqet ta shndërrojë edhe çështjen e Grubit në një tjetër bast politik, por këtë herë rreziku nuk lidhet vetëm me Grubin, por edhe me vetë Ahmetin.