Timço Muçunski: Për dy vjet kemi krijuar një diplomaci më të hapur, aktive dhe efikase

Me rastin e dy viteve të mandatit të Ministrisë së Punëve të Jashtme dhe Tregtisë së Jashtme, ministri Timço Muçunski mbajti sot një konferencë për shtyp, ku paraqiti rezultatet dhe aktivitetet kryesore të realizuara gjatë kësaj periudhe.

Muçunski tha se gjatë dy viteve të fundit puna është zhvilluar mbi bazën e një vizioni të qartë, prioriteteve të përcaktuara dhe synimit për ta forcuar pozitën ndërkombëtare të vendit, për të ndërtuar partneritete më të qëndrueshme dhe për të siguruar përfitime konkrete për qytetarët. Sipas tij, tashmë mund të thuhet se është ndërtuar një diplomaci më aktive, më e hapur dhe më efikase.

Në fjalimin e tij, ai nënvizoi se politika e jashtme ka mbetur e përqendruar te tre shtyllat strategjike: partneriteti i fortë me Shtetet e Bashkuara, harmonizimi i plotë me Politikën e Përbashkët të Jashtme dhe të Sigurisë të Bashkimit Evropian, si dhe pjesëmarrja aktive në Aleancën e NATO-s.

“Këto janë shtylla të stabilitetit, sigurisë dhe parashikueshmërisë. Këto janë shtylla të një shteti që e di se ku i takon dhe e di se ku dëshiron të shkojë”, tha Mucunski.

Duke folur për bilancin e punës, ministri bëri të ditur se gjatë dy viteve të fundit janë zhvilluar më shumë se 110 vizita pune jashtë vendit dhe janë mbajtur mbi 400 takime dhe tubime. Prej tyre, më shumë se 210 kanë qenë takime dypalëshe me burrështetas, ministra dhe përfaqësues të lartë nga e gjithë bota. Ai shtoi gjithashtu se vendi ka pritur më shumë se 40 udhëheqës dhe përfaqësues të lartë evropianë dhe botërorë.

Sa i përket integrimit evropian, Muçunski riafirmoi përkushtimin e palëkundur të Qeverisë ndaj reformave dhe rrugës evropiane. Në këtë kuadër, ai rikujtoi nënshkrimin e Partneritetit për Siguri dhe Mbrojtje me Bashkimin Evropian, si edhe sigurimin e parafinancimit nga Plani i Rritjes për Ballkanin Perëndimor.

“Komisioni Evropian kohët e fundit vuri në dispozicion 65.7 milionë euro përmes Instrumentit të Reformës dhe Rritjes, që është shuma më e lartë në rajon. Me këtë, shuma totale e fondeve të vëna në dispozicion të vendit tonë në kuadër të Planit të Rritjes ka arritur në 142.1 milionë euro. Kjo nuk është simbolikë. Ky është besim konkret i përkthyer në mbështetje konkrete”, theksoi Mucunski.