Qendra për Menaxhim me Kriza (QMK) bëri të ditur se, deri në orën 07:30 të 24 orëve të fundit, në të gjithë territorin e vendit janë evidentuar 29 zjarre në hapësira të hapura. Prej tyre, tre zjarre vazhdojnë të jenë aktive, një është vënë nën kontroll, ndërsa 25 janë shuar.
Të lidhura
None found
Flakët vijojnë në territorin e komunave Studeniçan dhe Zelenikovë, në zonën që shtrihet nga fshatrat Morane, Vrtekica dhe Ramni Gaber në drejtim të Paligradit, si dhe në pjesën mbi fshatin Vrazhale, ku është përfshirë një pyll i përzier. Një tjetër vatër aktive raportohet në fshatin Tërnovë të Gostivarit, ku po digjet pyll i përzier, ndërsa zjarri mbi fshatin Nezhilovë, në Komunën Çashkë, ka prekur pemë bredhi.
Nën kontroll është lokalizuar zjarri pranë fshatit Tajmishte në Kërçovë, në vendin e quajtur Darda, ku ishte përfshirë një pyll ahu me kërcell të lartë.
Gjatë së njëjtës periudhë janë shuar 25 zjarre në zona të ndryshme të vendit. Ndër komunat dhe vendbanimet ku janë regjistruar këto raste janë Strumica, Vasileva, Dellçeva, Kumanova, Jegunovca, Gostivari, Vrapçishti, Demir Hisari, Probishtipi, Ilindeni, Saraji, Çairi, Studeniçani, Haraçina, Makedonski Brodi, Novaci, Petroveci, Berova, Karbinci dhe Çeshinovë-Oblesheva.
Sipas QMK-së, zjarret kanë përfshirë bimësi të ulët, kashtë, bar të thatë, shkurre dhe sipërfaqe pyjore. Në disa prej rasteve janë dëmtuar gjithashtu mbeturina, kashtë, ndërtesa dhe një fole lejlekësh.
