Përshpejtohet realizimi i projekteve infrastrukturore në Shkup

I gjithë segmenti i nyjës rrugore “Momin Potok” pritet të hapet për përdorim deri në Vitin e Ri, bëri të ditur sot kryetari i Qytetit të Shkupit, Orce Gjorgjievski.

Gjatë mbikëqyrjes së sotme të punimeve në Momin Potok, Gjorgjievski sqaroi se ky investim kompleks kapital parashikon ndërtimin e pesë urave të reja, mureve mbajtëse mbrojtëse, si dhe korsive për biçiklistë dhe këmbësorë. Sipas tij, realizimi i projektit do të ndikojë në lehtësimin e ndjeshëm të qarkullimit në këtë zonë të qytetit.

Kryetari i Qytetit të Shkupit, Orce Gjorgjievski, deklaroi se në kuadër të nyjës rrugore janë ndërtuar rreth 2 kilometra mure mbajtëse dhe po zhvillohen punime në gjithsej pesë ura, krahas shtigjeve të dedikuara për biçikleta dhe këmbësorë.

Ai njoftoi se ura pranë vendit ku po kryhej inspektimi do të betonizohet të martën, ndërsa më pas do të hapet për të mundësuar lidhjen e plotë me rrethrrotullimin që gjendet 500 metra më larg. Gjorgjievski shtoi se ura e fundit po ndërtohet në pjesën e Sarajit, ku struktura e vjetër po rrënohet dhe njëkohësisht po zgjerohet.

Duke folur për bulevardin “Boris Trajkovski” në Draçevë, Gjorgjievski tha se të gjitha çështjet pronësore tashmë janë zgjidhur dhe punimet përgjatë trasesë po vijojnë. Edhe për këtë projekt, përfundimi është planifikuar deri në Vitin e Ri.

Gjorgjievski theksoi gjithashtu se gjatë muajit gusht do të nisë lidhja e Gazi Babës me Aerodromin nëpërmjet Bulevardit “Gjeneral Mihajlo Apostolski”, pasi pritet të përmbyllet afati për lirimin e objekteve.

Ndërkohë, kryeministri Hristijan Mickoski paralajmëroi se Qyteti i Shkupit do të pajiset me kamionë, cisterna dhe automjete për pastrimin e rrugëve. Ai bëri të ditur po ashtu se tenderi për autobusët elektrikë ka përfunduar, ndërsa aktualisht po zhvillohet procedura e ankesave.