Mickoski në Uashington: Forcojmë partneritetin strategjik dhe ekonomik me SHBA-në

Kryeministri Hristijan Mickoski, në krye të delegacionit qeveritar që po zhvillon vizitë pune në SHBA, realizoi sot në Uashington disa takime të rëndësishme me përfaqësues të institucioneve amerikane, Kongresit dhe sektorit ekonomik. Bisedimet u përqendruan në fuqizimin e partneritetit strategjik ndërmjet dy vendeve dhe në krijimin e mundësive të reja për investime e bashkëpunim ekonomik.

Në kuadër të vizitës, Mickoski u takua me Caroline Vic, drejtoreshë kryesore për politikat dhe ushtruese e detyrës së drejtoreshës kryesore për zhvillim në Korporatën Amerikane për Financimin e Zhvillimit Ndërkombëtar – DFC. Ky institucion, me kapacitet investues prej 205 miliardë dollarësh, është një nga instrumentet kryesore të SHBA-së për mobilizimin e kapitalit privat dhe nxitjen e investimeve në sektorë strategjikë.

Gjatë takimit u shqyrtuan mënyrat për zgjerimin e bashkëpunimit, si dhe mundësitë për investime në Maqedoni, veçanërisht në energjetikë, teknologji të larta dhe fusha të tjera strategjike. Në veprimtarinë e saj, DFC-ja i kushton rëndësi të posaçme energjetikës, infrastrukturës moderne dhe teknologjive të avancuara, ndërsa zgjerimi i kompetencave i ka mundësuar një kapacitet dukshëm më të madh për investime ndërkombëtare.

Qëndrimi në Uashington përfshiu gjithashtu një varg takimesh politike me përfaqësues të Kongresit amerikan. Mickoski zhvilloi bisedime me kongresmenin Keith Self, i cili drejton Nënkomitetin për Evropën pranë Komitetit për Punë të Jashtme të Dhomës së Përfaqësuesve të SHBA-së.

Në këtë takim u trajtuan rëndësia e partneritetit strategjik ndërmjet Maqedonisë dhe Shteteve të Bashkuara të Amerikës, interesat që bashkojnë të dyja vendet dhe hapësirat për avancimin e mëtejshëm të bashkëpunimit në fusha me interes të ndërsjellë.

Kryeministri u takua edhe me kongresmenen Claudia Tenney, bashkëkryetare e Grupit të Miqësisë me Maqedoninë në Kongresin e SHBA-së.

Biseda me Tenney vuri në pah marrëdhëniet tradicionalisht të fuqishme dhe miqësore ndërmjet Maqedonisë dhe Shteteve të Bashkuara të Amerikës. Po ashtu, u nënvizua roli i bashkëpunimit parlamentar, dialogut politik dhe shkëmbimit të përvojave ndërmjet dy vendeve.

Takimet e zhvilluara në Uashington janë pjesë e vazhdimit të angazhimeve për forcimin e partneritetit strategjik me SHBA-në dhe shndërrimin e tij në bashkëpunim të prekshëm ekonomik, investime të reja dhe projekte me rëndësi për vendin.

Gjatë vizitës në SHBA, kryeministri Mickoski do të marrë pjesë gjithashtu në Asamblenë e Përgjithshme të këtij viti të Kombeve të Bashkuara në Nju Jork. Në margjinat e Asamblesë së Përgjithshme të OKB-së janë planifikuar takime me një numër të madh liderësh shtetërorë.