Mickoski: Kemi në fokus një model ekonomik që garanton siguri dhe i nxit të rinjtë të qëndrojnë në vend

Kryeministri i RMV-së, Hristijan Mickoski, deklaroi sot se synimi i tyre është ndërtimi i një modeli të zhvillimit ekonomik që ofron siguri dhe i mban të rinjtë në vend.

Në fjalimin e mbajtur në aktivitetin “Shndërrimi i qëndrueshmërisë në konkurrueshmëri: Ndërtimi i bizneseve rezistente në një botë të pasigurt”, Mickoski tha se vitet e fundit termi qëndrueshmëri është shndërruar në një nga shprehjet më të përdorura në ekonominë globale.

Sipas tij, ky koncept nuk përfaqëson thjesht një rregullore të re, një standard të ri apo një procedurë të re administrative, por një transformim thelbësor të mënyrës se si funksionon bota.

Ai theksoi se sot nuk mjafton më vetëm prodhimi i një produkti cilësor për të qenë i suksesshëm. Sipas kryeministrit, suksesin e arrijnë ato kompani që dinë të administrojnë me përgjegjësi burimet, të investojnë te punonjësit e tyre dhe të ndërtojnë besim te investitorët, partnerët dhe konsumatorët.

Mickoski u shpreh se kur flitet për një vizion kombëtar të zhvillimit të qëndrueshëm, kjo nuk lidhet vetëm me ekologjinë, politikat e gjelbra apo përafrimin me standardet evropiane.

“Po flasim për një model të zhvillimit ekonomik që krijon siguri. Për një shtet rezistent ndaj krizave. Për institucione që krijojnë besim. Për një ekonomi që është e aftë të konkurrojë në tregjet më të zhvilluara. Për një ekonomi që krijon mundësi që të rinjtë të qëndrojnë këtu, të themelojnë kompani, të investojnë dhe ta ndërtojnë të ardhmen e tyre në vend. Sot, bota është dukshëm ndryshe nga ajo që njihnim para disa vitesh. Luftërat, kriza energjetike, ndërprerjet në zinxhirët e furnizimit, presionet inflacioniste dhe ndarjet e reja gjeopolitike treguan se stabiliteti ekonomik nuk mund të merret më si i mirëqenë”, theksoi Mickoski.

Ai shtoi se në rrethana të tilla, qëndrueshmëria nuk përbën më një alternativë, por një kusht të domosdoshëm për konkurrueshmëri.