LSDM: E mbështesim votën e diasporës, por jo një skemë që, sipas nesh, mundëson manipulimin e zgjedhjeve

Përplasjet politike për mënyrën e votimit të diasporës në zgjedhje po vijojnë. LSDM sërish i drejton akuza qeverisë, duke pretenduar se ajo nuk po heq dorë nga tentativat për, sipas kësaj partie, inxhinieri zgjedhore dhe manipulim të mbi 200,000 votave të emigrantëve.

Sipas LSDM-së, kundërshtimi i tyre nuk ka të bëjë me të drejtën e diasporës për të votuar, por me një model që, siç thonë, do të krijonte mundësi për grabitje zgjedhore.

“Pasi dështoi përpjekja e tyre kontrabandë për votim elektronik, pa asnjë kontroll, ata tani po përpiqen të imponojnë votimin me postë, përsëri pa asnjë kontroll dhe garanci sigurie për vullnetin e lirë të qytetarëve. Mickoskit nuk i intereson Axhenda e Reformës, është vetëm një mbulesë për grabitjen zgjedhore. Është gënjeshtër që LSDM-ja është kundër votës së diasporës, sepse emigrantët po votojnë edhe tani. Ne jemi kundër një modeli që i hap derën grabitjes zgjedhore dhe manipulimit të votave të 200,000 qytetarëve nga diaspora”, deklarojnë nga LSDM-ja.

Po ashtu, partia opozitare vlerëson se qeveria duhet të heqë dorë nga “këto qëllime” dhe të dalë me një propozim të ri, në të cilin votimi i diasporës të rregullohet nga KSHZ-ja përmes konsensusit.