LSDM akuzon Mucunskin për bisedime të fshehta mbi të ardhmen e Maqedonisë dhe kërkim të imunitetit pa rezultate

LSDM-ja akuzoi sot ministrin e Punëve të Jashtme, Timço Mucunski, se po negocion në fshehtësi me Bullgarinë.

Sipas partisë, në asnjë shtet normal një ministër i Jashtëm nuk mund t’u thotë qytetarëve se bisedimet që përcaktojnë të ardhmen e vendit të tyre përbëjnë sekret.

“Si mund të mbahet e fshehtë e ardhmja e Maqedonisë? Ndërkohë, Mucunski kërkon imunitet politik për Ministrinë e Punëve të Jashtme, duke pretenduar se ‘e gjithë Qeveria mund të kritikohet, por vetëm Ministria e Punëve të Jashtme jo’”, deklarojnë nga LSDM-ja.

Nga kjo parti e cilësojnë një qëndrim të tillë si të papranueshëm.

LSDM-ja thekson se Ministria e Punëve të Jashtme nuk qëndron mbi Qeverinë, por është pjesë e së njëjtës Qeveri që, për dy vjet, nuk ka hapur asnjë grumbull, ka tejkaluar afatet për reformat e premtuara deri më 1 qershor dhe, si të vetmin “rezultat”, paraqet narrativën se opozita nuk gëzon të drejtën të flasë.

Mucunski deklaron se, në dallim nga Qeveria e kaluar, “ata nuk janë të butë”, por LSDM-ja pretendon se faktet tregojnë një pasqyrë tjetër.

Sipas partisë, arritjet e Qeverisë së mëparshme janë pranuar edhe nga vetë përfaqësuesit e OBRM-PDUKM-së. Mickoski e ka përshkruar Marrëveshjen e Prespës si një “kryevepër të diplomacisë”, ndërsa presidentja Siljanovska-Davkova ka konfirmuar se identiteti, gjuha dhe kultura janë tërësisht të mbrojtura dhe të liruara nga përgjegjësia. Edhe vetë Mucunski sot flet për dobitë e anëtarësimit në NATO, ndonëse OBRM-PDUKM-ja për vite me radhë e ka kundërshtuar këtë proces.

“Që të tre, pra, i vlerësuan veprimet e Qeverisë së kaluar. Atëherë, për cilat ‘lëshime’ flet Mucunski? Qeveria e mëparshme punonte në mënyrë transparente”, thonë nga LSDM-ja./Telegrafi/