Filipçe: Qeveria e dinte që Korniza Negociuese nuk mund të ndryshohej, por manipuloi emocionet e qytetarëve

Sipas kryetarit të LSDM-së, Venko Filipçe, deklaratat e ministrit të Punëve të Jashtme, Timço Muçunski, dhe më pas të kryeministrit Hristijan Mickoski, se Protokolli i Dytë i Marrëveshjes për Miqësi, Fqinjësi të Mirë dhe Bashkëpunim mes Maqedonisë dhe Bullgarisë nuk përfshihet në Kornizën Negociuese me BE-në, dëshmojnë se pretendimet e mëparshme për rikthimin e emrit të vendit dhe rrezikimin e identitetit ishin pjesë e një skenari të sajuar për të penguar rrugëtimin evropian të vendit.

Gjatë një takimi me gazetarët, Filipçe deklaroi se pohimet e mëhershme të qeverisë, sipas të cilave Korniza Negociuese do të ndryshohej dhe se ajo përbënte kërcënim për gjuhën dhe identitetin maqedonas, kishin qenë të parapërgatitura.

“Ata e dinin se çfarë po bënin, po luanin me emocionet e njerëzve, duke bllokuar qëllimisht procesin e integrimit evropian”, u shpreh Filipçe. Ai shtoi se qeveria aktuale kishte dhënë premtime, ndonëse ishte e vetëdijshme se nuk do të mund ta rikthente emrin e vendit dhe as ta ndryshonte Kornizën Negociuese.

Duke komentuar kërkesën e qeverisë për garanci se Bullgaria nuk do të vendosë pengesa të tjera gjatë negociatave me BE-në, Filipçe vlerësoi se garanci të tilla nuk mund të sigurohen, pasi asnjë shtet nuk i ka pasur dhe askush nuk mund t’i ofrojë.

“Antonio Costa, kur ishte këtu, na tha hapur se nëse bëhen ndryshimet kushtetuese dhe përmbushen detyrat nga Axhenda e Reformave, askush nuk do të jetë në gjendje të na ndalojë në negociatat me BE-në. Sa i përket bllokimeve të paparimshme nga Bullgaria, sigurisht që do të donim të kishim garanci. Por çfarë ndodh nëse nuk ka. Si mund të na e heqë dikush gjuhën, kur ajo njihet”, tha Filipçe.