LSDM akuzon Klekovskin për pranimin e verdhëzës në Gostivar dhe kërkon përgjegjësi penale

Partia LSDM ka reaguar ashpër ndaj deklaratës së sotme të ministrit të Shëndetësisë, Sasho Klekovski, i cili pohoi se faza e mprehtë e epidemisë në Gostivar po fillon të zbutet dhe se tashmë vëmendja është përqendruar te diagnostikimi i hershëm i hepatitit A dhe E. Sipas LSDM-së, ky pranim vjen pasi më herët vetë Klekovski kishte rrëfyer se sistemi paralajmërues ishte aktivizuar me vonesë dhe se “dritat e kuqe” nuk ishin ndezur në kohë.

Sipas tyre, pasojat janë të rënda: i gjithë Gostivari u helmua dhe më shumë se 4.000 banorë u prekën nga sëmundja. Ata akuzojnë se asnjë nga zyrtarët e OBRM-PDUKM-së nuk ndërmori masa për të mbrojtur shëndetin e qytetarëve dhe askush nuk kreu inspektimet e nevojshme. Uji i ndotur, theksojnë ata, helmoi banorët e qytetit për 22 ditë rresht.

“Tash Klekovski pranon se ka raste të verdhëzës. Kjo është pikërisht ajo që parashikoi Venko Filipçe javën e kaluar – se kjo do të ndodhte dhe se ata nuk dinë ta menaxhojnë një krizë,” thuhet në reagim. LSDM-ja shton se rrëfimet e ministrit nuk janë asnjë dobi për njerëzit dhe se ka ardhur koha që ai të mbajë përgjegjësi para ligjit.

Ata e cilësojnë Klekovskin si një person pa dijen dhe kompetencën e duhur për t’u përballur me një emergjencë të tillë. Sipas LSDM-së, fillimisht situata u lejua të degradonte deri në këtë pikë; më pas të dhënat u fshehën dhe përgjegjësia u zhvendos për hir të përfitimeve politike. Rezultati, paralajmërojnë ata, do të jenë pasoja të rënda shëndetësore për qytetarët e Gostivarit.

“Për ta, numri i votave ka gjithmonë përparësi mbi jetën dhe mirëqenien e njerëzve. Ky është një grup kriminal i organizuar që mendon vetëm për tenderët e vet, jo për popullin,” përfundon reagimi i LSDM-së.