Komisionerja e BE-së për Zgjerimin, Marta Kos, ka prezantuar reformën e re të Bashkimit për zgjerimin, të paraqitur në dokumentin “Përgatitja për një Evropë më të gjerë”. Nisma sjell ndryshime të rëndësishme në mënyrën e vendimmarrjes për negociatat dhe pranimin e anëtarëve të rinj.
Të lidhura
None found
Ndër propozimet që prekin veçanërisht Maqedoninë është heqja e vetos gjatë negociatave dhe largimi nga praktika e vendimmarrjes me konsensus në BE. Megjithatë, vetoja do të mbetet në fazën përfundimtare: pranimi i një shteti të ri do të vazhdojë të kërkojë miratimin unanim të vendeve anëtare.
Në emër të Komisionit Evropian, Kos i kërkoi Këshillit Evropian të shqyrtojë përdorimin e shumicës së kualifikuar për hapjen e grupeve të negociatave dhe për etapa të tjera të ndërmjetme të procesit të anëtarësimit. Ajo nënvizoi se secili prej anëtarëve aktualë do ta ruajë të drejtën e vetos për vendimin përfundimtar.
Reforma parashikon gjithashtu integrim gradual, përmes të cilit vendet kandidate do të përfshihen hap pas hapi në përfitimet e anëtarësimit. Fillimisht, kjo do të ndodhë në tregun e vetëm dhe më pas do të shtrihet në fusha të tjera të politikave të Bashkimit.
Sipas Kos, kjo qasje nuk do të zëvendësojë anëtarësimin. Përparimi do të varet nga dy kushte kryesore: zbatimi i reformave dhe përafrimi me synimet e politikat strategjike të BE-së, ky i fundit një kriter i ri.
Komisionerja bëri të ditur se procesi mund të përparojë, por edhe të kthehet pas. Për vendet kandidate që shënojnë regres në sundimin e ligjit, në respektimin e të drejtave të njeriut, ose që kryejnë shkelje serioze të Nenit 4 të Traktatit të BE-së, do të parashikohen më shumë masa mbrojtëse. Ky nen kërkon respekt të ndërsjellë për integritetin territorial, sovranitetin kombëtar dhe identitetin, si dhe për “paktin e mossulmimit” të BE-së./Telegrafi/
