FSSH: 1.883 kërkesa për IVF janë paraqitur brenda një viti

Çdo mundësi e re për familjet që prej vitesh synojnë të bëhen prindër përfaqëson një shpresë të re. Pikërisht për këtë arsye, një vit më parë u miratua një nga ndryshimet më të rëndësishme në realizimin e së drejtës për fekondim të asistuar biomjekësor, duke e rritur nga tre në maksimum gjashtë numrin e përpjekjeve për IVF që mbulohen nga Fondi.

Nga Fondi për Sigurim Shëndetësor theksojnë se, pas vetëm një viti, të dhënat dëshmojnë që kjo masë nuk ka mbetur thjesht një mundësi e parashikuar me ligj, por është shndërruar në një të drejtë që shfrytëzohet realisht nga personat e siguruar.

Në periudhën prej 7 gushtit 2025 deri më 20 gusht 2026 janë dorëzuar dhe shqyrtuar gjithsej 1.883 kërkesa për IVF. Prej tyre, 237 kanë të bëjnë me përpjekjen e katërt, të pestë ose të gjashtë, të cilat më parë nuk mbuloheshin nga Fondi.

Sipas të dhënave, 216 kërkesa janë paraqitur për përpjekjen e katërt, 17 për të pestën dhe 4 për të gjashtën. Këto shifra përbëjnë rreth 12,6 për qind të numrit të përgjithshëm të kërkesave të shqyrtuara gjatë kësaj periudhe. Fondi i Sigurimeve Shëndetësore vlerëson se pas secilit rast qëndron një familje së cilës i është dhënë një mundësi shtesë për ta vazhduar procesin, aty ku më parë përfundonte mbështetja e sistemit.

Ndryshimet në fushën e fekondimit të asistuar biomjekësor nuk u kufizuan vetëm në shtimin e numrit të përpjekjeve të financuara.

Procedura u lehtësua edhe përmes dërgimit elektronik të njoftimit për miratimin e së drejtës për IVF. Njëkohësisht, afati për kundërshtim u zgjat nga 8 në 15 ditë, ndërsa i siguruari mund t’i marrë shërbimet shëndetësore BPO mbi bazën e njoftimit të Fondit, pa qenë i nevojshëm një udhëzim shtesë nga gjinekologu i zgjedhur në kujdesin shëndetësor parësor.

Fondi bën të ditur gjithashtu se për procedurat IVF të realizuara në tetë institucione shëndetësore me të cilat ka marrëveshje, gjatë vitit 2025 janë realizuar më shumë se 97,3 milionë denarë.