Perinski: Fondi Shëndetësor zbulon mbi 3 mijë raste të abuzimit me pushimet mjekësore

Fondi Shëndetësor ka identifikuar mbi 3 mijë raste në të cilat dyshohet se janë keqpërdorur pushimet mjekësore.

Gjatë një brifingu me gazetarët, drejtori Zllatko Perinski bëri të ditur se numri më i madh i shkeljeve është konstatuar mes punonjësve të sektorit publik, veçanërisht te pjesëtarët me uniformë të ushtrisë dhe policisë.

Sipas tij, në MPB dhe URMV janë evidentuar punonjës që vazhdojnë të jenë me pushim mjekësor prej më shumë se 5 vitesh. Megjithatë, shumica dërrmuese e rasteve të abuzimit përfshin periudhat nga 1-3 vjet dhe nga 3-5 vjet.

Perinski paralajmëroi se shkeljet do të kallëzohen në Prokurori për shkak të përfitimeve materiale të kundërligjshme. Përveç pacientëve, objekt hetimi do të jenë edhe mjekët amë dhe specialistët përgjegjës për lëshimin e raporteve mjekësore.

Hetimet do të përfshijnë gjithashtu anëtarët e komisioneve të fondit, të cilët kanë miratuar mungesat nga puna të arsyetuara si pasoja të problemeve të ndryshme shëndetësore.