ESHA: Të ardhurat nga kontributet nuk mbulojnë ende mungesën financiare në sistemin shtetëror pensional

Kontributet e mbledhura nga sigurimet pensionale dhe invalidore vazhdojnë të mos jenë të mjaftueshme për të përballuar deficitin e sistemit të pensioneve, sipas auditimit për vitin 2024 të Entit Shtetëror për Auditim të Fondit të Sigurimeve Pensionale dhe Invalidore të Maqedonisë së Veriut.

Në raportin e ESHA-s theksohet se auditimi për vitin 2024 ka dhënë opinion negativ lidhur me paraqitjen e saktë dhe të drejtë të gjendjes financiare dhe rezultateve të aktiviteteve financiare, si edhe për përputhjen e transaksioneve financiare me legjislacionin, udhëzimet dhe politikat përkatëse të përcaktuara.

Sipas raportit, të ardhurat nga kontributet e arkëtuara për PIO1 gjatë vitit 2024 janë rritur me 14% në krahasim me vitin 2023, duke arritur në 71,435,601 mijë denarë dhe duke zënë 61.74% të totalit të të ardhurave të realizuara.

Megjithatë, kjo rritje e të ardhurave në vitin 2024 mbetet e pamjaftueshme për të mbuluar shpenzimet për pensione, të cilat po ashtu shënojnë rritje çdo vit dhe gjatë vitit 2024 kanë arritur në 90.277.241 mijë denarë.

Të dhënat nga regjistri tregojnë se në fund të vitit 2024, sistemi numëronte 556.294 persona të siguruar dhe 343.048 pensionistë. Kjo përkthehet në një raport prej 1.63 të siguruar për çdo pensionist, duke shënuar një rënie të lehtë krahasuar me vitin paraprak.