Bashkimi Demokratik për Integrim ka reaguar ashpër ndaj skenave të regjistruara në pikën kufitare të Tabanocit, ku bashkatdhetarët tanë janë parë duke pritur në kushte skajshmërisht të vështira dhe nën diellin përvëlues. Sipas BDI-së, këto pamje janë thellësisht shqetësuese dhe nuk mund të tolerohen, pasi mërgata jonë nuk e meriton një keqtrajtim të tillë, as pritje degraduese që cënojnë rëndë dinjitetin e njeriut.
Të lidhura
None found
Nga kjo forcë politike theksojnë se bëhet fjalë për individët që për vite me radhë kanë mbështetur familjet e tyre dhe kanë dhënë një ndihmesë të pazëvendësueshme në zhvillimin ekonomik të shtetit. Në vend që autoritetet t’u ofrojnë lehtësira për një kalim të shpejtë dhe dinjitoz, ata ndeshen me radhë të gjata dhe procedura burokratike, të cilat në mes të sezonit të verës kthehen në një torturë të mirëfilltë.
BDI sqaron se askush nuk e vë në dyshim domosdoshmërinë e respektimit të ligjeve apo shlyerjen e gjobave të parashikuara. Megjithatë, ekzekutimi i normave ligjore nuk justifikon kurrsesi një qasje johumane. Institucionet kanë për detyrë të organizohen në mënyrë që çdo hap procedural të kryhet me shpejtësi dhe me konsideratë maksimale për të drejtat e qytetarëve.
Duke iu drejtuar partnerit të koalicionit qeveritar, BDI thekson se VLEN mban një pjesë të përgjegjësisë direkte për mënyrën sesi sillen institucionet shtetërore me popullatën. Heshtja përpara realitetit të hidhur të Tabanocit konsiderohet e pafalshme. “Emigranti nuk përbën as peshë dhe as kërcënim për vendin. Ai është një shtetas që ka të drejtë të trajtohet me nderim dhe respekt”, përfundon deklarata e BDI-së.
