Si e largon stresin Bill Gates? Dy ritualet e thjeshta të mbrëmjes që nuk kërkojnë shpenzime

Megjithëse njëri prej këtyre zakoneve mund të duket fare i zakonshëm, kërkimet tregojnë se ai mund të ndikojë në reduktimin e stresit.

Bill Gates, themeluesi i Microsoft dhe një nga njerëzit më të pasur në botë, ndjek një rutinë mbrëmjeje shumë më të thjeshtë nga sa mund të pritet. Edhe pse udhëton në vende të ndryshme dhe angazhohet në shumë projekte bamirësie, ai gjen kohë çdo mbrëmje për të larë enët pas darkës.

Gjatë një sesioni “Më pyesni çfarë të doni” në Reddit, Gates ka deklaruar: “I laj enët çdo mbrëmje”.

Pas sistemimit të kuzhinës, ai kalon te rituali tjetër që praktikon përpara se të flejë: leximi i një libri të mirë.

Larja e enëve si mënyrë për të reduktuar stresin

Në pamje të parë, larja e enëve është vetëm një detyrë e zakonshme shtëpiake. Megjithatë, studimet sugjerojnë se kur ajo kryhet me përqendrim të plotë, mund të sjellë një ndjesi qetësie.

Në vitin 2015, studiues të Universitetit Shtetëror të Floridës publikuan një studim mbi efektin e teknikave të vëmendjes së përqendruar gjatë larjes së enëve. Sipas rezultateve, vëmendja ndaj veprimeve, aromës dhe ndjesive të përjetuara gjatë kësaj pune mund të kontribuojë në uljen e stresit.

Një efekt i ngjashëm qetësues mund të arrihet edhe përmes detyrave të tjera të thjeshta dhe përsëritëse, veçanërisht nëse ato bëhen pa shpërqendrime.

Kështu, pas një dite të lodhshme, nuk është e domosdoshme të kërkohen metoda të ndërlikuara relaksimi. Edhe një veprim i zakonshëm si larja e enëve mund të shndërrohet në një çast pushimi dhe qetësimi për mendjen, transmeton Telegrafi.

Zakoni tjetër i Gates: një libër përpara gjumit

Gates njihet prej kohësh për pasionin e tij ndaj leximit. Ai publikon rregullisht shkrime në blog dhe u sugjeron të tjerëve libra që i kanë bërë përshtypje.

Leximi në mbrëmje mund ta zhvendosë vëmendjen nga shqetësimet e grumbulluara gjatë ditës dhe të ndihmojë në krijimin e një atmosfere më të qetë përpara gjumit. Disa kërkime e kanë lidhur këtë praktikë me reduktimin e stresit dhe me një cilësi më të mirë të gjumit.

Për Gates, librat duket se shërbejnë edhe për një qëllim tjetër. Nëpërmjet tyre, ai pasuron vazhdimisht njohuritë dhe zgjeron këndvështrimin e tij për botën. Interesin për të mësuar ai e ka ndërlidhur shpesh me angazhimet bamirëse dhe projektet globale ku është përfshirë.

Dy rituale të thjeshta që nuk kushtojnë asgjë

As larja e enëve dhe as leximi i një libri nuk tingëllojnë si zgjidhje të jashtëzakonshme për një mbrëmje pa stres. Megjithatë, mund të jetë pikërisht natyra e tyre e thjeshtë ajo që i bën të dobishme për shumë njerëz.

Të dyja këto veprimtari e shkëpusin mendjen nga ritmi i ngarkuar i ditës, krijojnë një rutinë të qëndrueshme dhe ndihmojnë në kalimin gradual drejt një gjendjeje më të qetë.

Shembulli i Bill Gates tregon se çlodhja pas një dite intensive nuk kërkon medoemos shpenzime. Nganjëherë, gjithçka që nevojitet është një lavaman i mbushur me pjata dhe një libër i mirë.