Konsumi i shpeshtë i mishit të kuq shoqërohet me rritje të rrezikut për kancer në pankreas, tregon një analizë e gjerë

Një rrezik i shtuar për t’u prekur nga kanceri i pankreasit mund të fshihet pas konsumimit të rregullt të sasive të konsiderueshme të mishit të kuq.

Këtë e sugjeron një përmbledhje e re kërkimore e shfaqur në revistën Frontiers in Nutrition, e cila grumbulloi informacion nga 16 studime me pothuajse dy milionë vullnetarë.

Ekipi hulumtues hetoi nëse ekziston një korrelacion midis sasisë së mishit të kuq dhe atij të përpunuar në dietë dhe paraqitjes së mëvonshme të tumorit pankreatik.

Sipas përfundimeve, individët që konsumonin më shpesh mish të kuq përballeshin me një rrezik relativ 16% më të madh për këtë sëmundje, në krahasim me grupin që e përdorte në sasi më të vogla.

Analiza nxori në pah gjithashtu një lidhje të drejtpërdrejtë: sa më i lartë të ishte konsumi i mishit të kuq, aq më shumë rritej probabiliteti për sëmundjen.

Konkretisht, për çdo 100 gramë mish të kuq shtesë të konsumuar brenda një dite, rreziku relativ për kancer pankreatik ngjitej me 10 për qind.

Pavarësisht këtij trendi, studiuesit nuk arritën të përcaktojnë një kufi të qartë, tejkalimi i të cilit do të shkaktonte një rritje të papritur të rrezikut.

Një tablo tjetër u shfaq për produktet e mishit të përpunuar, si proshutat, salsiçet dhe artikujt e ngjashëm.

Gjatë shqyrtimit të 11 studimeve, nuk u gjet asnjë lidhje me peshë statistikore midis marrjes së këtyre ushqimeve dhe kancerit të pankreasit, pa dallim nga niveli i konsumit.

Ky zbulim i ri vjen si plotësim i gjetjeve të mëparshme. Një tjetër meta-analizë e bërë publike gjatë këtij viti, e mbështetur në të dhënat e mbi 1.8 milionë njerëzve, kishte treguar se vegjetarianët gëzojnë një rrezik rreth 21 për qind më të ulët për tu prekur nga kanceri i pankreasit në krahasim me konsumuesit e mishit.

Sidoqoftë, autorët e hulumtimit nënvizojnë se gjetjet kërkojnë një interpretim të matur.

Pjesa më e madhe e të dhënave burojnë nga Evropa dhe ShBA-ja, ndërkohë që studimet e marra në shqyrtim janë kryesisht të natyrës vëzhguese dhe mbështeten tek pyetësorët mbi shprehitë ushqimore.

Këto modele kërkimore mund të nxjerrin në shesh një asociacion, por nuk dëshmojnë dot se mishi i kuq përbën shkakun e mirëfilltë të kancerit në pankreas. Veç kësaj, punimet e analizuara paraqitnin divergjenca të theksuara midis tyre.