Studimi: Konsumi i mishit të kuq mund të rrisë rrezikun e kancerit të pankreasit

Konsumimi i rregullt i sasive të mëdha të mishit të kuq mund të shoqërohet me një mundësi më të lartë për zhvillimin e kancerit të pankreasit.

Në këtë përfundim orienton një analizë e re e botuar në revistën shkencore Frontiers in Nutrition, ku u shqyrtuan të dhënat e 16 studimeve me afro dy milionë pjesëmarrës.

Hulumtuesit vlerësuan lidhjen e mundshme ndërmjet konsumit të mishit të kuq ose atij të përpunuar dhe shfaqjes së mëvonshme të kancerit të pankreasit.

Rezultatet treguan se pjesëmarrësit me konsumin më të lartë të mishit të kuq kishin një rrezik relativ 16% më të madh për këtë sëmundje sesa ata që konsumonin sasitë më të ulëta.

Analiza evidentoi edhe një marrëdhënie lineare: shtimi i sasisë së mishit të kuq të konsumuar shoqërohej me rritje të rrezikut.

Konkretisht, çdo 100 gramë mish të kuq më shumë në ditë lidhej me një rritje prej 10 për qind të rrezikut relativ për këtë formë kanceri.

Pavarësisht kësaj prirjeje, studiuesit nuk përcaktuan ndonjë kufi të veçantë pas të cilit rreziku të shënonte rritje të menjëhershme.

Përfundimet ishin të ndryshme në rastin e mishit të përpunuar, ku përfshihen sallamet, salsiçet dhe produkte të tjera të ngjashme.

Nga shqyrtimi i 11 studimeve nuk rezultoi ndonjë lidhje statistikisht domethënëse mes konsumit të mishit të përpunuar dhe kancerit të pankreasit, pavarësisht sasisë së konsumuar.

Gjetjet e reja u shtohen rezultateve të mëparshme. Një meta-analizë e publikuar sivjet, e mbështetur në të dhënat e mbi 1.8 milionë personave, kishte konstatuar se vegjetarianët përballen me rreth 21 për qind rrezik më të ulët për kancer të pankreasit krahasuar me konsumuesit e mishit.

Autorët paralajmërojnë, megjithatë, se këto rezultate kërkojnë interpretim të kujdesshëm.

Pjesa më e madhe e të dhënave është mbledhur në Evropë dhe në Shtetet e Bashkuara të Amerikës. Gjithashtu, studimet e përfshira kanë qenë kryesisht vëzhguese dhe janë mbështetur në pyetësorë për zakonet e të ushqyerit.

Studime të tilla mund të evidentojnë një lidhje, por nuk dëshmojnë se mishi i kuq e shkakton drejtpërdrejt kancerin e pankreasit. Përveç kësaj, mes studimeve të marra në analizë kishte dallime të konsiderueshme.