Zemaj falënderon qeverinë e shqiptare për vaksinimin e bluzave të bardha

Ministri në detyrë i Shëndetësisë në Kosovë Armend Zemaj ka falënderuar qeverinë shqiptare për mundësinë që i ofroi qindra mjekëve që të vaksinohen kundër Covid-19.

“Në emër të Ministrisë së Shëndetësisë të Republikës së Kosovës falënderojmë Qeverinë e Republikës së Shqipërisë dhe Ministrinë e Shëndetësisë dhe të Mbrojtjes Sociale, përkatësisht kryeministrin Rama dhe ministren Manastirliu, për mundësinë që u dhanë një numri të konsideruar të profesionistëve shëndetësor nga Kosova që të vaksinohen kundër COVID-19 në Kukës”, thuhet në falënderimin e Zemajt.

“Gjithashtu, një falënderim i veçantë edhe për profesionistët shëndetësor të Shqipërisë që me etikë dhe profesinalizëm të lartë administraun dhënien e vaksinave tek kolegët e tyre kosovarë përgjatë këtyre dy ditëve, bashkë me të gjithë ata që kontribuan në realizimin e vaksinimit (Ambasadorin Hasani, FSSHK-në, etj.), që si akt, përtej çdo simbolike, tregon rëndësinë e bashkëpunimit midis dy shteteve në funksion të mbrojtjes sa më adekuate kundër COVID-19”.

Po ashtu, Zemaj në deklaratën e tij thotë se në kohën kur premtimet e institucioneve të ndryshme ndërkombëtare treten në atë që quhet nacionalizmi i vaksinave, ndihma e Shqipërisë ka një peshë më të madhe, e trehon se të vegjlit mund t’ia dalin kur punojnë sëbashku.

“Në kohën kur institucionet e ndryshme ndërkombëtare, të cilat gjatë gjithë pandemisë shteteve të Ballkanit u kanë mbajtur ligjërata për qasjen dhe mundësitë e barabarta dhe kur solidariteti i proklamuar prej tyre për sigurimin e vaksinave kundër COVID-19 është tretuar nga nacionalizmi i vaksinave, ndihma e Shqipërisë për Kosovën, ka peshë edhe më të madhe dhe tregon se edhe të vegjëlit mund të ja dalin kur punojnë së bashku dhe nuk u mungojnë vlerat. Jam i bindur se profesionistët shëndetësor nga Kosova do ta vlerësojnë gjithmonë këtë kontribut të Qeverisë së Shqipërisë”.

Ministri u shpreh gjithashtu “falënderimi më i mirë nga ana e tyre është kujdesi që ata kanë treguar dhe po tregojnë gjatë gjithë këtyre muajve të pandemisë për qindra pacientë me Covid-19 nga zonat e veriut të Shqipërisë, të cilët në Spitalin e Prizrenit, Spitalin e Gjakovës, por edhe në QKUK, gjetën një trajtim sa profesional, aq edhe vëllazëror”.

Shtuar 21.03.2021 12:03