Detaje të reja janë bërë të ditura për vrasjen e 44-vjeçares shqiptare Esma Meço në rajonin e Rodopit. Bashkëshorti i saj, Bujar Meço, 53 vjeç, me origjinë nga Gramshi, dyshohet se e goditi për vdekje me thikë në banesën ku jetonin.
Krimi ndodhi pasditen e së mërkurës, më 26 gusht, në vendbanimin Dialambi. Sipas të dhënave, 44-vjeçarja u godit me thikë në qafë. Në shtëpi ishte edhe vajza 16-vjeçare e çiftit, e cila u bë dëshmitare e skenës tragjike.
Të lidhura
None found
Menjëherë pas sulmit, djali 19-vjeçar i familjes e dërgoi me urgjencë të ëmën në Spitalin e Komotinit. Mjekët u përpoqën ta shpëtonin, por gruaja nuk mundi t’u mbijetonte plagëve dhe u shpall e vdekur.
Në vendin ku ndodhi krimi, autoritetet sekuestruan dy thika. Pas ngjarjes, 53-vjeçari i dyshuar tentoi të vetëvritej. Ai u dërgua në të njëjtin spital, pasi kishte pirë një sasi të panjohur lëngu, që dyshohet se mund të ketë qenë pesticid ose vaj. Gjithashtu, kishte shkaktuar me thikë plagë sipërfaqësore në zonën e barkut.
Bujar Meço vijon të qëndrojë i shtruar në spital dhe ruhet nga policia. Informacionet bëjnë të ditur se gjendja e tij shëndetësore nuk përbën rrezik për jetën.
Pas vrasjes është mësuar se Esma Meço kishte marrë vendimin për t’u divorcuar. Avokatja Evangelia Kola deklaroi se 44-vjeçarja e kishte telefonuar vetëm një ditë përpara krimit, me qëllim që të vazhdonte procedurat e divorcit. Ato kishin lënë një takim për të enjten, por viktima nuk arriti ta realizonte këtë hap.
Sipas avokates, Esma Meço ishte përballur prej vitesh me dhunë në familje dhe kishte denoncuar edhe më parë episode të dhunshme. Mes tyre përfshihej një rast i ndodhur në Kretë në vitin 2022, si dhe një incident tjetër në Komotini.
Evangelia Kola tha gjithashtu se bashkëshorti i viktimës përdorte ilaçe dhe se, në një periudhë, kishte qëndruar në një klinikë psikiatrike. Më vonë ishte vlerësuar se trajtimin mund ta vazhdonte jashtë spitalit.
Hetuesit po shqyrtojnë dyshimet se xhelozia dhe vendimi i 44-vjeçares për t’i dhënë fund martesës mund të kenë ndikuar në konfliktin që përfundoi me vrasjen e saj. Avokatja e ka përkufizuar ngjarjen si femicid, duke nënvizuar se marrëdhënia e çiftit ishte shoqëruar prej kohësh nga dhuna dhe xhelozia.
Esma punonte gjatë sezonit në një njësi hoteliere në Thassos. Ajo ishte kthyer në banesë për të qëndruar pranë vajzës së saj 16-vjeçare, e cila festonte ditëlindjen pikërisht më 26 gusht.
Dy fëmijët e viktimës, përkatësisht 16 dhe 19 vjeç, tashmë përballen me pasojat e tragjedisë së rëndë familjare. Autoritetet greke kanë nisur procedimin ndaj 53-vjeçarit për vrasje, dhunë në familje dhe shkelje të legjislacionit për armët. Hetimet vazhdojnë për të sqaruar të gjitha rrethanat dhe mënyrën se si u zhvillua krimi.
