Ile Gjuni, nëna e 3-vjeçarit të rrëmbyer nga gjyshërit ka treguar më shumë detaje për ngjarjen. Në një lidhje telefonike me emisionin “Me zemër të hapur”, 23-vjeçarja tha se vjehrra kishte plan për ta rrëmbyer vogëlushin. Sipas saj, njerëzit e burrit, që kishte ndërruar jetë nuk e linin të dilte nga shtëpia.
“Vjehrra më ka thënë që në fillim që kam plan që të ta marr djalin. Më ka thënë se do ta zgjidhim vetëm me Kanun. Unë e kam respektuar. Pasi ka vdekur Avniu, u prishën raportet mes nesh sepse nuk donte të më linte të ikja.
Pas vdekjes së bashkëshortit tim, nipi flinte me gjyshen, sepse isha në punë. Nuk është e vërtetë fare që kam dashur të martohem. Unë iu kam thënë të gjithëve se nuk dua të dal asnjëherë jashtë shtetit, janë fjalë që nuk dua t’i dëgjoj, pasi nuk janë të vërteta”, u shpreh nëna e 3-vjeçarit.
Dy ditë më parë, më 20 prill, gjyshja e vogëlushit, Bahrije Gjuni u arrestua.
Ajo pranoi të dorëzonte djalin në polici. Në një deklaratë për hetuesit, Bahrije Gjuni tregoi edhe ku kishte qëndruar e fshehur për rreth një javë.
“E kemi vendosur së bashku me bashkëshortin tim Rexhepin ta merrnin nipin e ta rrisnim vetë sepse ai është djali i djalit tonë. Në këtë mënyrë të shtunën që shkoi e morëm dhe unë u largova nga shtëpia dhe u nisa për në fshatin tim në Gjinaj të Krumës te prindërit e mi. Atje kam fjetur një natë. Ditën tjetër kam shkuar te Vendi i Mirë në fshatin Buzmadh të Kukësit. Në Buzmadh kam fjetur një natë. Ditën e tretë kam shkuar në Kukës te një kushërira ime ku kam fjetur një natë. Pastaj kam shkuar në Tiranë ku kam fjetur në 4 hotele të ndryshme.
Vendosa ta dorëzoj nipin për shkak të ndjekjes së policisë por edhe se një vëlla i imi u arrestua e një tjetër është shpallur në kërkim pasi ata nuk kanë gisht në këtë çështje”, ka deklaruar gjyshja.
Bahrije Gjuni është personi i tretë i arrestuar në lidhje me këtë ngjarje. Më herët në pranga ranë bashkëshorti i saj Rexhep Gjuni dhe i vëllai për të cilët Gjykata e Durrësit vendosi masën e sigurisë “Arrest me burg”./albeu.com
