Vendosja e flamujve kombëtarë në Kllokot për nder të 28 Nëntorit, Serbia e quan “provokim”

Vendosjen e flamujve kombëtar në Kllokot, për nder të 28 nëntorit, Serbia e ka quajtur provokim dhe “përpjekje për ta frikësuar popullin serb”.

Pas vendosjes së flamujve të Shqipërisë në rrugët e Kllokotit në nder të festës së 28 nëntorit, ka reaguar e ashtuquajtura Zyre për Kosovë në Qeverinë e Serbisë.
Në reagimin e të ashtuquajturës Zyre për Kosovë në Qeverinë e Serbisë, thuhet se vendosja e këtyre flamujve është një provokim kundrejt Serbisë. Për Serbinë, kjo është “përpjekje për ta frikësuar popullin serb”.
“Flamujt shqiptarë nuk kanë çfarë të kërkojnë pranë shtëpive të serbëve, e Kishës së Shën Pjetrit e Palit, prandaj ky ‘dekorim’ i papërshtatshëm nuk mund të interpretohet ndryshe veçse si provokim dhe një hap tjetër drejt krijimit të ‘Shqipërisë së Madhe’”, thuhet në reagim.

Ata kanë bërë thirrje që festa e flamurit të mos përdoret për provokime.
“Shqiptarët kanë të drejtë të festojnë festat e tyre, por është e pavend kur e bëjnë këtë në zona të banuara me serbët. U bëjmë thirrje shqiptarëve në Kosovë të mos e përdorin Ditën e Flamurit të Shqipërisë për thellimin e hendekut ndëretnik dhe për të frikësuar dhe provokuar serbët”.